Kualifikim me monedhë, Shqipëria prek finalen
Dje mundi 2-1 Sampdorian, sot do të sfidojë Italinë
Vazhdon ecuria pozitive e Kombëtares U19 nën drejtimin e Erjon Bogdanit. Ditën e djeshme, kuqezinjtë kanë arritur të sigurojnë kualifikimin për në finalen e turneut miqësor "Lazio Cup", duke mposhtur në gjysmëfinale ekipin e të rinjve të Sampdorias me rezultatin 2-1. Ekipi kuqezi arriti të kualifikohet për në finalen e këtij kompeticioni pas tri fitoresh radhazi.
KUALIFIKIMI ME SHORT - Kalimi i grupit nga Kombëtarja kuqezi U-19 u bë falë një shorti të thjeshtë me monedhë. Arsyeja është shumë e thjeshtë. Mes Shqipërisë U-19 dhe skuadrës U-17 të klubit Racing Roma në fund të ndeshjeve të grupit kishte një barazi totale, nga 4 pikë dhe numrat e golave të shënuar e të pësuar identikë. Gjithashtu, ndeshja direkte u nda në barazim. Kështu, për të përcaktuar se cili ekip do të kalonte grupin si i dyti pas Fiorentintës, u përdor një metodë shumë e vjetër, u hodh në ajër një monedhë, e cila u buzëqeshi kuqezinjve të Bogdanit.
GJYSMËFINALJA - Kuqezinjtë e Bogdanit kaluan të parët në avantazh që në minutën e tetë falë golit të Franc Pjetrit. Mirëpo festa e shqiptarëve ka zgjatur vetëm 3 minuta, sepse Sampdoria e barazoi rezultatin. Gjithçka u vendos në pjesën e dytë me golin e Fabian Blakcorrit, i cili realizoi në minutën e 28-të të këtij fraksioni. Me këtë fitore të arritur, Shqipëria do të luajë
ditën e sotme në orën 10:30 në ndeshjen finale ndaj Italisë B, e cila fitoi në gjysmëfinale ndaj NK Istria me rezultatin 3-1. Kombëtarja U-19 ka shansin e artë për të fituar këtë turne miqësor dhe për të kultivuar te të rinjtë mënyrën drejt triumfeve.