Milani, presion Donarumës
Menaxheri Raiola justifikohet dhe përgënjeshtron zërat për presion nga ana e tij
Drejtuesit kuqezinj i janë përveshur punës në merkato dhe këtë e dëshmojnë tri goditjet e realizuara deri më tani. Jo më pak vlen çështja e rinovimeve me atë të Donarumës, që nga prioritet po kthehet çdo ditë e më shumë në një problem. Menaxheri i futbollistit, Mino Raiola, po i bën presion klubit kuqezi duke shpalosur ofertat me shumë zero që vijnë nga Anglia. Nga ana e tij, Jonghong Li nuk stepet nga ky shantazh menaxherial. Sipas burimeve të mediave italiane nga brenda "Casa Milan", presidenti i Milanit, shumë i acaruar me Raiolën, duket t'u ketë dhënë ultimatumin vartësve të tij, ose Xhixho nënshkruan për 4 vite me 3-3.5 milionë euro në sezon, ose përndryshe vitin e tij të fundit në kontratë do ta kalojë në tribunë, si portier i katërt i "Djallit", pasi nuk do të shitet për asnjë lloj shifre. Ndoshta, kjo kundërpërgjigje e papritur nuk zbut grykësinë e supermenaxherit napolitan, por me siguri lëkund portierin e ri, i cili nuk dëshiron të humbë Botërorin e vitit të ardhshëm në Rusi, çka mund ta detyrojë të nënshkruajë kontratën e re. Nga ana e tij, Mino Raiola në një deklaratë të shkurtër për mediat italiane u përpoq të qartësonte pozicionin e tij në lidhje me vonesën në rinovimin e kontratës së Xhanluixhi Donarumës me Milanin. Për Raiolën, shumica e zërave të ditëve të fundit janë të rreme dhe dashakeqe: "Nuk është e vërtetë që drejtuesit e Milanit kanë kërcënuar Xhixhon me tribunë në rast mosnënshkrimi. Askush nuk ka thënë që lojtari nuk do të rinovojë, ndaj them me bindje se të gjitha lajmet e deritanishme janë 95%
gënjeshtra. Xhixhon e pret kombëtarja dhe pushimet. Jam në bisedime me klubin e tij, do të diskutojmë e do vendosim, por mund të them se me parametër zero nuk ikën askush".
Në rast se marrëveshja mes palëve dështon, Milani do të synojë 27-vjeçarin Vojçek Shezni, i cili ka dhënë prova besueshmërie gjatë dy viteve të fundit në Itali, ku ka luajtur për
Romën. Sidoqoftë, të martën mes Mino Raiolës dhe drejtorit sportiv Mirabeli pritet një takim nga ku do të vendoset ecuria e marrëdhënies midis Xhixhos dhe klubit që i hapi dyert e suksesit. Në rastin më të keq, 18-vjeçari do të qëndrojë edhe një vit te Milani, duke treguar se ajo puthje e fanellës disa muaj më parë vlen më pak se paundi anglez.