Seria A, surprizat nuk kanë të sosur
Java e fundit e Serisë A do të japë verdiktet e fundit për këtë sezon. Atalanta e nis me luftën për vendin e 4- t, që do të ishte një rekord për bergamaskët. Kapiteni romanist Toti u jep lamtumirën ngjyrave të një jete, teksa Napoli do të shpresojë për një përmbysje të momentit të fundit. Edhe Juvja kampione e rekordeve, kërkon primatin e radhës, të mbyllë kampionatin pa asnjë të përjashtuar me karton të kuq. Në kërkim të rekordit edhe mbrojtësi i Sasuolos, i cili mund të arrijë rekordin e një kampionati të plotë të luajtur pa humbur asnjë minutë.
LIGA E KAMPIONEVE - Duhet përcaktuar e klasifikuara e vendit të dytë, që garanton pjesëmarrjen në fazën në grupe të Kupës me veshë të gjatë. Roma ka 84 pikë, dy më shumë se Napoli. Kryeqytetasve do t'u mjaftojë të mundin Xhenoan në "Olimpiko" për të blinduar vendin e dytë. Napoli nga ana e tij duhet të fitojë në fushën e Sampdorias dhe të shpresojë që Roma të mos fitojë. MBIJETESA NË A - Klasifikimi është i qartë, Empoli 32 pikë, ndërsa Krotone 31, me të parët që u duhet të fitojnë në fushën e Palermos që Serisë A i ka thënë me kohë "lamtumirë". Krotones i duhet të fitojë në shtëpi kundër Lacios dhe të shpresojë që në Palermo vendësit të fitojnë ose të paktën të barazojnë. Nëse Krotone shpëton, do të jenë ekipi i parë në histori që siguron "shpëtimin" me vetëm 9 pikë të grumbulluara gjatë fazës së parë. E FUNDIT E TOTIT - Pas 25 vitesh magji suksese dhe gola, Françesko Toti do të luajë ndeshjen e fundit me fanellën e Romës. Kaq mjafton!
BERGAMO REKORD - Me Europën në "xhep", djemtë e Gasperinit kanë barazuar rekordin e tyre të mëparshëm, duke u renditur të pestët. Për ta thyer primatin e tyre, Atalantës i duhet fitorja ndaj Kievos dhe falë golit të Gomez ia arriti qëllimit. Tashmë zikaltërve u dehet shpresojnë që Lacio të mos fitojë sot ndaj Krotones. XHEKO & MERTENS - Golat në kampionat janë duel më vete, 28 gola të boshnjakut kundër 27 të belgut. Qendërsulmuesi klasik kundër një 9 të vërtetë, por jo tipike. Bomber mund të jetë njëri nga të dy nëse uragani Beloti nuk realizon ndonjë "poker" ndaj Sasuolos. JUVJA NUK SKUQET - Juventus kampione pa njollë: Bufon me shokët janë e vetmja skuadër e padënuar kurrë me karton të kuq gjatë Serisë A të sivjetshme. Në Bolonjë u luajt në atmosferë feste dhe kartoni i verdhë i Kuadrados ishte maksimumi i "negativitetit" juventin. PRIMATI AÇERBI - 3330 minutat e këtij kampionati i ka luajtur të gjitha. Për Françesko Açerbin edhe 90 minuta ndaj Torinos dhe bëhen 3420: plot një kampionat i tërë. Bionik.