Vllaznia dhe Flamurtari braktisën vetë Europën
FSHF njoftoi për refuzimet më 4 maj, Tirana shpëton në limit
Kukësi, Partizani, Skënderbeu, Luftëtari dhe Teuta janë klubet më korrekte sa i përket plotësimit të kritereve të licencimit që kërkon UEFA për pjesëmarrjen në kompeticionet europiane. Gjatë viteve të fundit, institucioni më i lartë i futbollit europian ka shtrënguar masat për licencimin e klubeve dhe në çdo federatë ka dërguar një listë me pesë kritere, që duhen plotësuar patjetër nga klubet që synojnë të marrin pjesë në Ligën e Kampioneve dhe Ligën e Europës. Pas një heshtjeje të gjatë dhe absurde, dje FSHF gjeti momentin për të njoftuar se cilat klube shqiptare kanë të drejtë të marrin pjesë në Kupat e Europës, nëse më parë arrijnë të kualifikohen sportivisht. Në konferencën për shtyp, specialisti i sektorit të licencimit në FSHF, Eduart Gjini, konfirmoi vendimet që janë marrë për klubet aplikante, të cilat janë monitoruar prej pesë muajsh. Që në muajin prill, Komisioni i Licencimit vendosi të japë OK-in për klube si Kukësi, Partizani, Skënderbeu, Luftëtari dhe Teuta, ndërsa refuzuan Tiranën, Vllazninë, Flamurtarin dhe Laçin. Përmbushja e detyrimeve të kriterit financiar është pika më e rëndësishme. Kësisoj, klubet që u refuzuan nga FSHF vuajtën pikërisht prej situatës jo të mirë financiare. Megjithatë, Tirana dhe Laçi ia doli të licencohej pas ankimimit që bëri, duke plotësuar edhe kërkesën për auditimin e bilancit financiar. Nga ana tjetër, që më 4 maj, klube si Vllaznia dhe Flamurtari, pasi mësuan se nuk plotësonin kriterin financiar, nuk e morën mundimin të dërgonin çështjen në Komisionin e Apelit. Ajo që kishte paralajmëruar "Panorama Sport" prej kohës, ndodhi. Si vlonjatët, ashtu edhe shkodranët, për shkak të detyrimeve që kanë, nuk kishin shanse të licencoheshin. UEFA kërkonte me patjetër që klubet të paraqesin një dokument nga drejtoria rajonale tatimore për taksat e paguara, mirëpo Vllaznia dhe Flamurtari nuk e bënë këtë, në një kohë që detyrimet i kanë prej vitesh dhe në shifra të mëdha. Kësisoj, mungesa e licencimit për në Kupat e Europës tregon qartazi se pse Vllaznia apo Flamurtari nuk u mobilizuan gjatë muajit të fundit të kampionatit për të kapur vendin e katërt në renditje. Të dyja skuadrat u mjaftuan me sigurimin e mbijetesës vetëm në javën e fundit të Superiores.