Ederson te Siti, portieri më i shtrenjtë në histori
Thyen rekordin e Bufonit, gardiani më i kushtueshëm në botë
Mançester Siti ka nisur ofensivën për të transferuar portierin e Benfikës, Ederson në "Etihad" këtë javë, ndërsa Pep Guardiola ka nisur shumë shpejt punën për ndërtimin e skuadrës së re. "Qytetarët" shpresojnë ta finalizojnë marrëveshjen sa më shpejt dhe Ederson është në krye të listës së tyre. 23-vjeçari konsiderohet një prej portierëve më të talentuar të Europës dhe pranoi të dielën se finalja e Kupës së Portugalisë ndaj Vitorias mund të ishte ndeshja e tij e fundit për klubin. Guardiola e la të lirë portierin Vili Kabajero javën e shkuar dhe firmosja me një gardian të ri ka qenë prioritet i katalanasit. Ky transferim pritet të thyejë rekordin për një portier, me lajmet që vijnë nga Portugalia se marrëveshja mund të mbyllet për më shumë se 35 milionë paund. Siti nuk kërkon të humbasë kohë për rindërtimin e skuadrës dhe pas Bernardo Silvës, i cili firmosi nga asgjëja për 43 milionë paund, Pep kërkon të mbyllë sa më shpejt edhe me mbrojtësin e Totenhemit, Kajl Uoker, dhe yllin tjetër të Monakos, Benxhamin Mendi. DETAJET
Ederson fluturoi drejt Mançesterit që ditën e hënë dhe sot pritet që të kryejë vizitat mjekësore. Nëse transferimi do të kryhet për shifrën e përfolur, atëherë ai do të bëhej portieri më i shtrenjtë në historinë e futbollit dhe do të thyente rekordin e transferimit të Xhanluixhi Bufonit nga Parma te Juventusi në vitin 2001 për shifrën e 32.6 milionë paundëve. Braziliani u transferua nga akademia e Sao Paulos te Benfika në moshën 16vjeçare, por ai largua nga klubi pas dy viteve dhe u aktivizua
tek ekipet e kategorive inferiore, Ribeirao dhe më pas Rio Ave, përpara se Benfika ta transferonte përsëri në verën e vitit 2015. Ardhja e tij në "Etihad" shton dyshimet për të ardhmen e Klaudio Bravos, të cilin Guardiola e transferoi nga ish-klubi i tij, Barcelona, verën e shkuar për 17.1 milionë paund. Por në Mançester rikthehet edhe Xho Hart, pas përfundimit të huazimit me Torinon. Megjithatë, e ardhmja e ish-numrit 1 pritet të jetë sërish larg "qytetarëve", këtë herë me një destinacion përfundimtar.