Hamilton provokon Ferrarin
Toto Uolf: Nuk besoj se fitorja e "kokëkuqes" ka qenë e orkestruar
Pas Çmimit të Madh të Monakos, Luis Hamilton është i bindur se Ferrari ka zgjedhur Sebastian Fetel si pilotin e tij të parë. Gjermani triumfoi në "Grand Prix"-in e fundjavës në Principatë ndërsa strategjia e ndjekur nga bokset për "pit stop"-in e favorizuan atë që të mposhtte shokun e skuadrës Kimi Raikonen. "Është shumë e qartë se Ferrari e ka zgjedhur se kush është piloti i parë dhe është e sigurt se do të bëjë gjithçka që Fetel të marrë maksimumin e pikëve", është mesazhi i dhënë nga britaniku i Mercedesit. Hamilton ngre dyshime se është shumë e vështirë për makinën numër një të bëjë një hap përpara për aq kohë sa skuderia favorizon makinën tjetër. Megjithatë Hamilton thekson se nuk do t'i kërkonte Mercedesit që ta favorizonte atë në të njëjtën mënyrë ndaj shokut të skuadrës Valteri Botas. "Unë nuk kam folur me ekipin dhe me të vërtetë nuk e kam planifikuar asnjëherë një skenar të tillë. Valteri ka bërë një punë të shkëlqyer dhe unë nuk ndiej që ne duhet ta favorizojmë njërin ose tjetrin. Është me të vërtetë e rëndësishme që ne po punojmë si grup më shumë se kurrë më parë. Sepse detyra jonë është që të mposhtim Ferrarin në garën për konstruktorë". Hamilton përfundoi i shtati në Monako pasi u nis nga "pole position"in i 13- ti pas një sesioni zhgënjyes në kualifikuese për shkak të një serie gabimesh. "Ferrari duket se po punon në çdo aspekt kësisoj 14 garat e ardhshme do të jenë shumë të vështira. Makina jonë nuk po funksionon ashtu siç ne do të donim, por gradualisht me garat ne kemi çfarë të mësojmë për të qenë më kompetitivë". Drejtuesi i Mercedesit hedh poshtë çdo hamendësim për favorizim nga ana e Ferrarit të Fetelit ndaj Raikonen. "Nuk ishte aspak e qartë se si do të performonin gomat. Ata duhej të fusnin një nga dy pilotët në 'pit stop'. Gomat super të buta nuk ishin mjaftueshëm të shpejta në fillim. Sebastian arriti të regjistronte disa xhiro të shpejta me gomat e përdorura super të buta, duke i dhënë atij avantazhin ndaj Kimit. Ndaj nuk mendoj se kjo ka qenë e orkestruar nga ana e Ferrarit".