Rikthehet skema e vjetër, De Biazi fikson titullarët

Zbardhet formacioni, me katër lojtarë ofensivë nga fillimi

Shqipëria do të guxojë në Izrael për një "hak marrje" pas asaj humbjeje tronditëse në fundvitin e kaluar në "Elbasan Arena". Pas eksperimentit të dështuar me skemën 3-5-2, Xhani De Biazi ka punuar gjatë ditëve të fundit të grumbullimit në Turqi me variantin taktik 4-1-4-1, që në fazën ofensive, bëhet edhe 4-3-3. Katër lojtarë me tipare ofensive do të jenë në fushë që nga minuta e parë. Edhe në stërvitjen e djeshme, trajneri aplikoi për afro 60 minuta një ndeshje brenda grupit, duke lënë të kuptohet se cilët do të jenë titullarët. Ashtu siç ka paralajmëruar "Panorama Sport" pas miqësores së humbur në Luksemburg, De Biazi i është rikthyer variantit klasik, me të cilin bëri historinë, duke çuar Shqipërinë në Europian gjatë vitit të kaluar. Skema me pesë mesfushë dhe me një sulmues të deklaruar duket më e përshtatshmja për grupin e lojtarëve që ka në dispozicion italiani. Me mungesën e sigurt të Etrit Berishës dhe kapitenit Ansi Agolli për shkak të pezullimeve, por duke shtuar këtu edhe dëmtimin e Bekim Balajt, Shqipërisë i duhet të ndryshojë në emra, duke filluar nga porta. Thoma Strakosha do të jetë numri një në Izrael, ndërsa ndryshimi i vetëm në mbrojtje është Naser Aliji në vend të Agollit në krahun e majtë. Me Hysajn në të djathtë dhe Gjimshitin e Mavrajn në qendër, reparti defensiv kompletohet. Përpara mbrojtjes në rolin e një kontrollori do të jetë Burim Kukeli, i cili mbetet një nga lojtarët më të preferuar të epokës De Biazi. Nga krahët e mesfushës do të luajnë Rroshi në të djathtë dhe Hyka në të majtë. Ky i fundit po kalon një formë të mirë, teksa ka fituar balotazhin me Llullakun. Në qendër të mesfushës, De Biazi i ka besuar të palodhurit Abrashi dhe fantazisë së Memushajt. Dilema e vetme mbetet maja e sulmit: nëse deri dy ditë më parë favorit ishte Cikalleshi, dje në stërvitjen e fundit në Turqi u provua Sadiku me titullarët. Sulmuesi i Luganos duket favorit, por çdo gjë do të vendoset sot në stërvitjen e fundit në Izrael. E rëndësishme është që dy lojtarët po kalojnë një moment të mirë, pasi kanë mbyllur sezonet në Turqi dhe Zvicër si kryegolashënues të skuadrave të tyre. De Biazi ka bërë shpesësh rrotacion në sulm dhe ndoshta këtë herë mund të jetë radha e Sadikut titullar, duke ulur në stol Cikalleshin.