Kombëtarja U-21 humbet Ndojin, Bare dhe Zeka mendojnë fitoren
Mesfushori i Breshias mungon ndaj Estonisë
Kombëtarja Shpresa nuk do të ketë në dispozicion mesfushorin Emanuele Ndoj për ndeshjen e së hënës ndaj Estonisë. Ky i fundit u dëmtua gjatë javës së kaluar në një prej seancave stërvitore të kuqezinjve të rinj dhe nuk u aktivizua as në miqësoren ndaj Francës. Dje, përmes një njoftimi të FSHF-së, është bërë e ditur se futbollisti, i cili aktivizohet me Breshian në Serinë B dhe që mendohej të ishte një prej titullarëve para këtij grumbullimi, nuk ka kaluar dëmtimin e pësuar disa ditë më parë. Ndoji pritej të riaftësohej në kohë dhe të ishte gati për duelin që do të zhvillohet në "Elbasan Arena".
Stafi mjekësor i ka komunikuar dje trajnerit Alban Bushi që futbollisti nuk është në gjendje për t'u aktivizuar në këtë përballje zyrtare. Ndërkohë, skuadra U-21 vijon përgatitjet në Pogradec, teksa stafi është fokusuar në seancat e fundit vetëm në anën taktike. Bushi shpreson që të jetë
në 100% të formës edhe kapiteni Endri Çekiçi, i cili, në miqësoren ndaj Francës, pësoi një dëmtim të lehtë dhe u zëvendësua në pjesën e parë.
BESIMI - Mesfushorët Kejdi Bare dhe Agim Zeka besojnë se Shqipëria do të fitojë të hënën kundër Estonisë. Dy lojtarët folën në një konferencë për shtyp nga rezidenca e Kombëtares në Pogradec. "Jam shumë i lumtur që jam thirrur me Kombëtaren Shpresa. Nëse aktivizohem, do të bëj të pamundurën. Shpresoj që të fitojmë, mendoj se i kemi të gjitha mundësitë, pasi jemi një grup i mirë lojtarësh", ka thënë fillimisht Zeka, i cili ishte pjesë e Skënderbeut dhe tani luan me Lilën në Francë. Ndërsa mesfushori i Atletiko Madridit, Bare, u shfaq optimist, duke u bërë apel edhe tifozëve. "Do të japim maksimumin për të mundur Estoninë. Mendoj se jemi në një gjendje të mirë. U bëj thirrje të rinjve
dhe tifozëve që të na përkrahin sa më shumë në shkallët e stadiumit, sepse kjo na jep më shumë siguri në lojën tonë. E kemi studiuar kundërshtarin dhe jam i bindur se do të fitojmë të hënën në Elbasan, duke e nisur mbarë edicionin", përfundoi lojtari fierak.