Ekubani pëlqen Lidsin, Kievo e bllokon
Partizani e pret deri në fund, Torasa dhe Cetkoviç pjesë e skuadrës për Ligën e Europës
Partizani i sezonit të ri pritet të marrë rrugë në fillim të javës tjetër, ku skuadra do të nisë përgatitjet për pjesëmarrjen në turin e parë paraeliminator të Ligës së Europës. Të kuqtë do ta nisin punën pa praninë e golashënuesit më të mirë të sezonit të fundit, Kaleb Ekuban, i cili ishte i huazuar te "demat" nga klubi italian i Kievos. Të kuqtë dëshirojnë që ta kenë pjesë të tyre sulmuesin edhe për sezonin e ri, por e ardhmja e italo-ganezit është në dorë të skuadrës së Serisë A, që posedon kartonin e lojtarit. Kievo po studion disa pista, ku bën pjesë edhe shitja e Ekubanit, por për një shumë mbi 500 mijë euro. 23-vjeçari ndodhet me pushime në Amerikë, por është joshur nga oferta e Lids Junajtid në Angli. Mësohet se anglezët i kanë ofruar 250 mijë euro në sezon Ekubanit, por Kievo nuk është bindur për këtë transferim, pasi Lidsi nuk e përmbush ofertën për kartonin e lojtarit, që është mbi 500 mijë euro. Në këto kushte, pritet që Kievo ta përfshijë Ekubanin në listën e lojtarëve që do të grumbullohen për fillimin e përgatitjeve për sezonin e ri. Gjatë kësaj periudhe, klubi italian do të shqyrtojë ofertat për Ekubanin dhe nëse nuk e shet, do t'i rinovojë kontratën. Gjithsesi, Partizani mbetet në pritje të qartësimit të situatës së sulmuesit. Gjasat janë që Ekuban të mos jetë pjesë e të kuqve për turin e parë në Europë, por do ta presin 23-vjeçarin deri në fund të gushtit.
Torasa-Cetkoviç - Në dallim nga Ekuban, Partizani shpreson që për Ligën e Europës të ketë shërbimet e dy futbollistëve të huaj që ishin pjesë e skuadrës në kampionatin e fundit, Torasa dhe Cetkoviç. Fantazisti malazez mendohet se do të rinovojë edhe për një vit me "de- mat", ndërsa argjentinasi ka shprehur dëshirën që karrierën ta vazhdojë në vendlindje, por mund të jetë në shërbim të Partizanit për Kupat e Europës. Gjatë javës së vjen do të qartësohet edhe e ardhmja e Agustin Torasës dhe Marko Cetkoviçit te Partizani. Nëse për argjentinasin ka pikëpyetje rreth rikthimit të tij, për Cetkoviç situata është pozitive, pasi edhe vetë malazezi ka shprehur se dëshiron të mbetet i kuq.