Asnjë ndërhyrje në “Roza Haxhiu”, Hasalla jep alarmin te Lushnja
Mungon projekti për punimet, rrezikohet skuadra
Kalimi i Lushnjës në Superiore nuk i ngjan aspak situatës së krijuar para katër viteve, kur skuadrës iu desh të sakrifikonte një sezon në të Parën (20122013) për restaurimin e stadiumit. Asokohe, ekipi luajti 70% të kampionatit jashtë fushës për të qenë gati për Superioren (2013-2014). Por, këtë vit, rezultatet sportive nuk po shoqërohen me investime, pasi asgjë nuk është gati në "Roza Haxhiu". Edhe pse do të militojnë në mesin e më të mirëve, impianti nuk plotëson kriteret që FSHF- ja kërkon. Edhe pse po afron mesi i muajit qershor, punimet në stadiumin e Lushnjës apo në terrenet stërvitore pranë tij ende nuk kanë filluar. Madje, fusha ku kryhen edhe përgatitjet është më shumë se e dëmtuar. Edhe pse skuadra ka dy javë që ka mbyllur aktivitetin, në "Roza Haxhiu", në ambientet e jashtme dhe të brendshme, nuk ka lëvizur asgjë. Bashkia e Lushnjës nuk ka publikuar ende projektin e rikonstruksionit të Superiores. Nga ana tjetër, njësia vendore nuk ka publikuar asnjë datë zyrtare për startin e punës. Gjithçka për momentin duket e "ngrirë". Alarmi - Blerim Hasalla, një nga emrat e njohur të futbollit lushnjar, jep alarmin për "Panorama Sport". Ai thekson se mungesa e infrastrukturës po i sjell një dëm të pariparueshëm Lushnjës së futbollit. "Ngjitja në elitë ka gëzuar gjithkënd në Lushnjë. Por, përtej misionit të realizuar me sukses prej ekipit, problemati-
ka nuk është venitur. Tani Lushnja është përballë gjendjes së vështirë të infrastrukturës. Kjo është një histori e vjetër e Lushnjës. Fushat me pluhur në verë dhe me baltë në dimër nuk janë diçka e panjohur për futbollin lushnjar. Unë kam punuar me skuadrën e të rinjve dhe është
tepër e vështirë të punohet në këto kushte", tha ish-futbollisti i njohur i Lushnjës dhe i disa skuadrave të tjera të Superiores. "Si do t'i përgatisë Lushnja ndeshjet me Kukësin, Partizanin, Skënderbeun?! Secili ka ambientin e vet, ka resortin e vet. Lushnja nuk ka një fushë në
kushte normale, e cila duhet të bëhet njëherësh me stadiumin. Gjendja e terreneve po i sjell një dëm të pariparueshëm Lushnjës, edhe në nxjerrjen e elementit të ri. Rikonstruksioni i fushave dhe stadiumi i Superiores do ta rilindë futbollin e këtij qyteti", tha Hasalla. Alban Alushi