Skënderbeu, si shëtitje në turin e parë të Ligës së Europës

Mund të sfidojnë Prishtinën dhe Shkëndijën e Tetovës

Skënderbeu ka zhvilluar dje seancën e parë stërvitore në Slloveni duke nisur kështu fazën përgatitore për turin e para paraeliminator të Ligës së Europës. Bardhekuqtë kanë gjetur kushtet e përshtatshme për të zhvilluar një fazë më se normale. Në dy ditët e para, trajneri Ilir Daja nuk e ka pasur të plotë grupin. Orges Shehi dhe Liridon Latifi janë të grumbulluar me Kombëtaren dhe do të bashkohen me ekipin më 15 qershor, ndërsa Marko Radas ende nuk ka mbërritur në Slloveni. Lojtari ka marrë edhe disa ditë më shumë leje nga klubi dhe pritet që sot të bashkohet me grupin. E njëjta gjë thuhet edhe për Bruno Ditën, afrimin më të ri të Skënderbeut, që sapo të mbarojë pushimet në Turqi do të bashkohet me ekipin. I fundit në listë është nigeriani Xhejms Adeniji, i cili pret të pajiset me vizën e punës më 12 qershor dhe më pas të bashkohet me ekipin. Skënderbeu në bazë të koeficientit të përgjithshëm që ka ranglistën e klubeve të përcaktuara nga UEFA, 6.825, ka përparësi në turin e parë paraelimintor të Ligës së Europës duke qenë në vazon klubeve favorite. Siguria për korçarët vjen edhe në turin e dytë, ku sipas llogaritjeve, sërish edhe në variantin më të keq të mundshëm

Skënderbeu është në vazon e parë. Gjithsesi, e rëndësishme për momentin është se Skënderbeu radhitet i 13-ti, në listën me 100 ekipe që marrin pjesë në turin e parë paraeliminator të Europa Ligës. Skënderbeu është i 13- ti në radhë me koeficientin 6.825. Kjo

arritje vjen si rezultat i përfaqësimit dinjitoz të korçarëve në edicionet e kaluara, por është penalizuar disi nga përjashtimi që UEFA u bëri bardhekuqve sezonin e kaluar. Në turin e dytë eliminator, bardhekuqtë mbajnë një pozicion mjaft të favorshëm. Në këtë tur do të

marrin pjesë 66 ekipe, dhe Skënderbeu renditet i 22-ti për nga koeficienti. Kundërshtarët - Më 19 qershor hidhet shorti për turet e para paraeliminatore në Kupat e Europës. Kundërshtarët e mundshëm të Skënderbeut në turin e parë mendohet se janë të një niveli më të ulët se korçarët. Për këtë arsye, ky tur pritet që të jetë më se i kalueshëm për Skënderbeun. Në këtë listë ekipesh, më të njohurat prej tyre janë vetëm disa si: Shamrok Rovers, Sutjeska apo Pujnik, por, gjithsesi, shikohen si inferiorë ndaj Skënderbeut. E veçanta për këtë tur të parë është se ekipi i trajnerit Ilir Daja mund të përballet me Shkëndijën e Tetovës apo me ekipin e Prishtinës. Pra nuk përjashtohet mundësia e një derbi shqiptarësh në Europa Ligë. Gjithsesi, korçarët janë më të qetë dhe të përgatitur për kalimin e turit të parë, që në letër duket si një shëtitje për bardhekuqtë. Llazi Saro