Besëlidhja e re, zbardhet lista
Ja lojtarët që do të qëndrojnë sërish, priten afrime të rëndësishme në merkato
Pushimet verore janë për futbollistët, por jo për drejtuesit e klubeve dhe menaxherët e lojtarëve që janë të angazhuar maksimalisht. Te Besëlidhja lëvizjet gjatë merkatos pritet të jenë intensive. Por, deri tani janë konfirmuar vetëm largimet, ndërsa sa u përket afrimeve nuk ka asnjë zyrtarizim. LARGIMET
Deri tani tre janë futbollistët titullarë që ka shumë gjasa të largohen nga Besëlidhja, mbrojtësi i majtë Edison Ndreca, mesfushori guineas Lancinet Sidibe dhe sulmuesi Sekou Kamara. Ndonëse nga presidenti ka pasur deklarata për një
"revolucion" të mirëfilltë, ka gjasa që boshti i skuadrës të ruhet, pasi deri tani nuk ka ndonjë lëvizje. Dy lojtarët afrikanë kanë spikatur te skuadra lezhjane dhe kërkohen nga disa ekipe të Superiores, madje edhe nga jashtë. Pritet që, në ditët në vazhdim, të mësohet përfundimisht e ardhmja e tyre. KUSH QËNDRON
Sipas informacioneve në klub, pritet që te Besëlidhja të qëndrojnë një pjesë e mirë e titullarëve që ishin gjatë kampionatit të kaluar. Gjasat janë që të qëndrojnë sërish portieri Demi, mbrojtësit Dibra, Smajli dhe Semina, mesfushorët mund Hepaj dhe O. Kamara, ndërsa në sulm Marashi e Ajazi. Dhe gjatë merkatos, do të ndërhyhet për të mbushur vendet vakantë që do të lënë futbollistët që do ikin. Megjithatë, Besëlidhja ka një traditë pozitive në menaxhimin dhe trajtimin e moshave, duke prodhuar mjaft futbollistë tepër cilësorë që po bëjnë historinë nëpër skuadrat më të mira të Superiores. Përveç Besëlidhjes, në Lezhë zhvillojnë aktivitetin e tyre edhe dy akademi private që militojnë në Superioren e moshave si Briansi dhe Porto që tashmë kanë nxjerrë brezin e parë të futbollistëve. Në Lezhë, përveç Besëlidhjes, tashmë në Kategorinë e Parë militon edhe Shënkolli ku sezonin që lamë pas bëri një paraqitje shumë të mirë duke e siguruar mbijetesën. Besëlidhja do të jetë sërish pretendente për në Superiore edhe në kampionatin e ardhshëm.