Etika, hipokrizi me trukimet
Vetëm një sfidë nën hetim, mbyllen sytë për tolerimet dhe aleancat e hapura
Komisioni i Etikës pranë FSHF- së vendosi të nisë hetimet për ndeshjen ElbasaniTurbina (3-1) të sezonit të kaluar. Një hap në qiell të hapur, në një kohë që të gjithë prisnin vendimin për Skënderbeun. Etika vazhdon të tregohet hipokrite në lidhje me ndeshjet e trukuara që po shtohen vit pas viti në kampionatet shqiptare. Nëse ky komision merr në hetim Elbasani-Turbina, duhet t'i shkojë të vërtetës deri në fund dhe të marrë në shqyrtim shumë takime të sezonit të fundit në Kategorinë e Parë, ku "teatri" u shfaq hapur. Gjithashtu, akuzat nga vetë aktorët kanë qenë të shumta për tolerime dhe aleanca të hapura. Nëse mëkatarë do të ishin vetëm Elbasani dhe Turbina, kampionatet në Shqipëri do të ishin për t'u marrë shembull me vetëm një ndeshje si të dyshuar e trukuar! NDESHJET
Fenomeni i tolerimit të ndeshjeve për sezonin që përfundoi nisi që në dhjetor të 2016- ës. Video e golave të
sfidës Kastrioti-Iliria(1-2) bëri xhiron e rrjetit ku skuadra krutane toleronte në mënyrë qesharake ndaj "vëllezërve" fushëkrujas, dy klube që kanë të njëjtin pronar, Bashkinë e Krujës. Megjithëse pamjet ishin të qarta dhe të dukshme për një "teatër" që po luhej në fushën e
blertë, skandal që u denoncua edhe nga media, vetëm anëtarët e Komisionit të Etikës nuk e panë. Kulmi arriti në fazën e tretë, ku një pjesë e madhe e ndeshjeve ishin të toleruara. Në Grupin A, Besëlidhja dhe Shënkolli, skuadra të të njëjtit rreth, dhuruan sfida më shumë miqësore në katër përballje. Besëlidhja i fitoi të katërta ndeshjet ndaj shënkollasve që e arritën synimin e tyre që në fund të fazës së dytë. Edhe presidenti i Kamzës, Naim Qarri, akuzoi për një lojë jo të pastër, ku Besëlidhja i kishte të garantuara 12 pikët ndaj Shënkollit. Për ndeshjen Pogradeci- Lushnja(2-2) të 30 prillit u hodhën dyshime të mëdha se ishte vendosur që sfida të përfundonte në barazim. Bylisi akuzoi hapur pas asaj ndeshjeje. Nga pamjet filmike duket qartë tolerimi i lushnjarëve pas avantazhit 2- 0 ku brenda pak minutash pësojnë dy gola. Edhe përballja Tomori-Bylisi (23) e 22 prillit ishte më shumë se qesharake. Beratasit shënuan dy gola dhe më pas pësuan me lehtësinë më të madhe tre gola në 16 minuta. Rreth 80% e takimeve të fazës së tretë në Kategorinë e Parë ishin të toleruara ku lojtarët vinin në zbatim urdhrat që vinin nga tribuna. Kjo situatë u krijua edhe për shkak të skemës së dështuar të aplikuar nga FSHF. Gjithashtu, Etika ka "harruar" edhe Tirana-Kukësi(1-2), përballjen që u shndërrua në miqësore me kampionët e Shqipërisë që fituan ndeshjen më të lehtë të sezonit.