Duka, 480 mijë euro rrogë Inzagit
Duka mund ta takojë personalisht për të bindur trajnerin
Ado të mjaftojë një drekë apo një darkë në Ibiza, ashtu siç ndodhi për largimin e De Biazit në Durrës, për të gjetur trajnerin e ri të Kombëtares shqiptare? Në "meny" është një emër i njohur në futbollin botëror si Filipo Inzagi, aktualisht trajner i Venecias në Serinë B. Federata Shqiptare e Futbollit ka avancuar bisedimet me ishtrajnerin e Milanit dhe kërkon që ta mbyllë sa më shpejt marrëveshjen me të. Dyshimet, frika mbi projektin e së ardhmes dhe dilemat për të marrë apo jo drejtimin e Kombëtares shqiptare janë duke shoqëruar "Super- Pipon" në këto ditë pushimi në Formentera. Aty ku ka qëndruar me vëllanë e tij Simone Inzagi dhe familjen. Ndoshta nuk duhet të habitet nëse në një nga këto ditë në telefonin e tij do të bjerë një zile për të caktuar datën, vendin dhe orën e takimit. Nga ana tjetër e celularit është Armand Duka, i cili pasi ka folur me menaxherin e trajnerit, kërkon ta takojë nga afër për ta bindur dhe për t'i shuar frikën.
OFERTË SI DE BIAZI Përtej emocioneve, frikës dhe dëshirës për të nisur një aventurë ndërkombëtare, Inzagi dhe Duka sigurisht që do ta nisin diskutimin me pyetjet: Sa kërkon?, Sa ofron? Në Itali shkruajnë se për Inzagin nuk është çështje pagese, por sigurisht që për të braktisur projektin që nisi me Venecian duhet të jetë i kënaqur edhe në këtë aspekt. Mësohet se për momentin oferta e Federatës Shqiptare të Futbollit është 480 mijë euro në vit, po aq sa paga e ishtrajnerit kuqezi, De Biazi. E thënë ndryshe, Inzagi dhe stafi i tij do të paguhen 40 mijë euro në muaj.
STAFI, PROBLEM
Nëse ka një pikë, në të cilën Inzagi nuk do të futet fare në diskutime dhe e ka si kusht për të drejtuar Shqipërinë është fakti që ai kërkon të marrë me vete të gjithë stafin e tij, i cili përbëhet nga 6-7 persona. Kjo është një çështje që do të diskutohet gjatë mes palëve për të arritur gjuhën e përbashkët, sepse numri i madh i bashkëpunëtorëve që Pipo mund të sjellë në Tiranë do të thotë se duhet një pagë më e lartë sesa 40 mijë euro në muaj për t'i kënaqur të gjithë. Në stafin aktual të In-
zagit, ka emra shumë të njohur dhe bashkëpunëtorë të Ançelotit te Milani dhe të Leonardos tek Interi. Ish- sulmuesi kuqezi ka ruajtur të gjithë kontaktet me ata që dikur e stërvitnin dhe i ka marrë me vete te Venecia. Ata janë njerëzit e tij të besuar dhe
nuk ka ndër mend të shkojë në një tjetër skuadër, qoftë kjo edhe kombëtare pa i marrë me vete "ushtarët", të cilët ia bëjnë punën më të lehtë dhe e ndihmojnë për të arritur rezultatet pozitive. Inzagi pritet të kthejë përgjigje brenda muajit qershor.