Korçarët mund të ankohen vetëm në Apelin e FIFA-s
Klubi do ankimojë, por ekziston edhe risku
Në vendimin e zbardhur dje, Komisioni i Etikës, në pikën e fundit, ndër të tjera citonte: "Kundër këtij vendimi, lejohet ankim, sipas nenit 18 të Kodit të Etikës". Tashmë klubi korçar ka 21 ditë kohë për të përgatitur dosjen e ankesës në FIFA. Sipas nenit 18, vetëm në këtë organ juridik mund të bëhet ankimimi për çështje të tilla. "Vendimet e Komisionit të Etikës mund të depozitohen për apelim në Komisionin e Apelit të FIFA-s, me përjashtim të rasteve kur vendimi i dhënë është: Vendimet e dhëna nga Komisioni i Apelit të FIFA-s që nuk depozitohen në Gjykatën e Arbitrazhit Sportiv (CAS) janë përfundimtare".
Pak orë pas vendimit, përmes një komunikate për shtyp, klubi i Skënderbeut theksoi se "vendimi do të ankimohet në çdo germë të tij, pasi jemi të sigurt në pafajësinë tonë të pakundërshtueshme". Mirëpo, historia e Skënderbeut me FIFA-n ka edhe riskun me vete. Një ankesë e korçarëve në këtë komision mund të kthehet në "bumerang" dhe FIFA të hapë më pas një proces disiplinor në bashkëpunim me UEFA- n. Këtë e paralajmëroi vetë shefi i zyrës juridike në UEFA, Emilio Garsia. "Organet tona po marrin në konsideratë masa disiplinore të vërteta. KAS-i Lozanës mbështeti këndvështrimin tonë të bazuar mbi luhatjet e koeficienteve dhe shumave të hedhura nga bastet sportive", pat thënë Garsia. Duke qenë se vendimi për Skënderbeun ka qenë administrativ një vit më parë, tashmë ekziston risku që kjo çështje të rihapet dhe ndoshta korçarëve nuk u intereson të ankimojnë vendimin në FIFA.