Hoxhallarin e djeg Mustedanagiç
Një telefonatë e presidentit të Dinamos së Zagrebit me trajnerin e U-17 bllokoi marrëveshjen
Erion Hoxhallari ish te pranë transferim it te gjigandët kroatë të Dinamos së Zagrebit. Marrëveshja ishte praktikisht e mbyllur, megjithatë në momentet e fundit është prishur gjithçka. Klubi më i titulluar në Kroaci kishte ofruar afro 200 mijë euro për kartonin e mbrojtësit të linjës së majtë dhe mësohet se klubi i Tiranës kishte rënë parimisht dakord. E vetmja gjë që kishte mbetur ishte hedhja e firmës mbi kontratë, por kjo gjë nuk ndodhi. Qëllimi i Dinamos së Zagrebit ishte që ta merrte këtë element dhe më pas mund ta xhironte tek ekipe satelit. "Panorama Sport" zbardh prapaskenën që bllokoi kalimin e 21-vjeçarit drejt 18 herë kampionëve. Ka mjaftuar një telefonatë e presidentit Zdravko Mamiç që gjithçka të mbetej në vend. Kreu i klubit ka folur me mikun e tij të vjetër, Xhemal Mustedanagiç, i cili prej vitit 2010 drejton U-17 e Shqipërisë. Kujtojmë që trajneri gjatë karrierës së tij si futbollist numëron 444 ndeshje me Dinamon e Zagrebit, madje për disa sezone ka qenë edhe në krye të pankinës së këtij ekipi. Mësohet se Mustedanagiç i ka thënë që lojtari nuk është ende gati për Dinamon, pasi do të përshtatet me stilin e lojës që ata bëjnë. Kaq i ka mjaftuar numrit një të klubit kroat që ta mbyllë këtë "operacion" me kaq, duke pezulluar rrjedhimisht edhe marrëveshjen. E megjithatë shanset që ai të shitet pas ndeshjeve europiane ekzistojnë ende, ndërsa kujtojmë që për llogari të mbrojtësit kanë shfaqur interes edhe dy klube të tjera kroate, konkretisht Lokomotiva e Zagrebit dhe Rijeka.