Ze Maria shtrydh lojtarët, kush humb topin bën... 10 pompa
Argëtim dhe ndëshkime, paradite u analizua Makabi me DVD
Stërvitje, argëtim dhe shumë ndëshkime. Ishte kjo panorama e seancës së djeshme stërvitore te Tirana. Në një kohë që Ze Maria ishte përqendruar te lojtarët e repartit defensiv, pjesa tjetër u veçua në pjesën tjetër të fushës dhe nisi që të zhvillonte disa kuadrate, nën survejimin e rreptë të përgatitësit atletik Rafael Kosta. Ky i fundit vendosi edhe rregulla të prera, kush nuk mbante topin aq sa i kërkohej, do të dënohej. Dhe masa ishte me "pompa". Për minuta me radhë, mesfushorët dhe sulmuesit realizuan këtë ushtrim që shpeshherë shkaktoi edhe të qeshura. Ata që e pësuan më së shumti ishin Merveil me Dokën, të cilëve iu desh që disa herë të bënin nga 10 pompa. Sakaq, ndër të paktët që rezultoi i suksesshëm në këtë lojë ishte Erando Karabeci. Kapiteni nuk gaboi dhe kurrë nuk u detyrua që të vuante ndëshkimin. Bardheblutë janë të përqendruar te përgatitjet për ndeshjen e parë të turit të parë paraeliminator kundër Makabi Tel Aviv, që do të zhvillohet të enjten në "Netanja Stadium". Edhe pse ngarkesat janë maksimale, tekniku brazilian dje zhvilloi vetëm një seancë, atë të pasdites. Paraditja ishte pushim absolut për lojtarët, ndërsa nuk u detyruan që të zbrisnin në fushë. Megjithatë, sërish qëndruan të grumbulluar në Dajt. Relaksi gjithsesi nuk bën pjesë në ditët e kryeqytetasve, pasi gjatë drekës u zhvillua edhe një analizë. Me anë të DVD-ve, nisën që të studionin kundërshtarin. Dihet që izraelitët janë realisht të fortë, madje në letër favoritë, por kjo nuk e pengon stafin teknik që të përgatisë grupin në të gjitha drejtimet. Me anë të pamjeve filmike, Ze Maria nisi që të "zbërthente" Makabin, ndërsa evitoi pikat e forta dhe të dobëta. Elementë që do të shfrytëzohen për t'i kthyer në armë për duelin e 29 qershorit.