Vllaznia, merkato mbetet peng e pagesave... kesh
Lojtarët kërkojnë paradhënie në momentin që firmosin kontratën
E ardhmja te skuadra e Vllaznisë vazhdon të jetë disi e paqartë, duke qenë se skuadra nuk ka nisur nga puna për sezonin e ardhshëm futbollistik dhe një gjë të e tillë mund të dëmtojë jo pak ekipin. Shkak është bërë një mbledhje e munguar e drejtuesve më të lartë, të cilët ende nuk kanë gjetur kohën për të biseduar. Por, çështja më e rëndësishme që do të diskutohet është ajo e gjetjes së financave dhe klubi duhet të marrë garanci nga bashkia për vazhdimësinë e punës. Por, ditët e fundit duket se të gjithë vëmendjen e ka marrë fushata elektorale.
Moszgjidhja e çështjes financiare është shqetësimi kryesor që ndikon jo pak në ecurinë e mëtejshme. Një problematikë e tillë nuk ka munguar as në sezonet e tjera dhe kjo ka bërë që skuadra të zhvillojë merkato të nxituar në mbyllje të saj. Sigurimi sa më shpejt i financave do të
bëjë të mundur përgatitjen e terrenit se ku do të zhvillohet faza përgatitore dhe sigurimin e bazës materiale. MERKATO - Por mungesa e financave bën që edhe merkato të mbetet në vend. Në këtë drejtim, krahasuar me ekipet e tjera, kuqeblutë janë shumë
mbrapa. Tani do të mbetet që të mblidhen organet drejtuese të klubit, duke nisur që nga kryebashkiakja Ademi e të gjithë me radhë në mënyrë që të nisë puna për ndërtimin e skuadrës së sezonit të ardhshëm. Trajneri Armando Cungu e ka bërë të qartë se në fund të qershorit ose maksimumi në fillim të korrikut skuadra duhet të jetë në fushën e stërvitjes sepse ndryshe pasojat për të do të jenë të mëdha. Për momentin, një nga çështjet kryesore që mbetet për t'u zgjidhur është ajo e financave. Pasi lojtarët që do të afrohen kërkojnë pagesa në dorë në momentin e firmës. Ndaj mes klubit dhe bashkisë mund të gjendet një zgjidhje që të lirohet një fond për merkaton. Vetëm kështu mund të arrihet të kompletohet ekipi dhe të nisë faza përgatitore, për të cilën deri në këto momente nuk është thënë asgjë. Admir Uruçi