Kamza hap dyert, Ndreu: Do t'i provojmë të gjithë
Trajneri nis nga puna dhe bën me dije se më 2 korrik skuadra do të jetë e plotë për fazën përgatitore
Te Kamza ka nisur një fazë seleksionuese, e cila do të vijojë deri më 2 korrik kur do të grumbullohet dhe ekipi. Gjatë kësaj periudhe, do të provohet një numër i madh lojtarësh. Krahas këtij procesi, po vazhdon gradualisht edhe merkatoja për plotësimin e vendeve vakant. Duke u nisur edhe nga fakti se nuk ka asnjë lojtar të ardhur apo të zyrtarizuar që të ketë nënshkruar, drejtuesit janë duke piketuar mjaft prej lojtarëve që atyre u nevojiten për të ndërtuar një ekip cilësor dhe konkurrues. DEKLARATA - Në një prononcim për "Panorama Sport", trajneri Ramadan Ndreu ka zbuluar edhe planin e veprimit të ekipit të tij. "Kemi vendosur që nga dita e hënë deri të shtunën kush dëshiron të provohet pranë klubit kamzali është i mirëpritur. Ne nuk do të shikojmë CV e lojtarit apo preferencën e klubit nga vjen, por do të përcaktojmë aftësitë individuale dhe cilësitë e tij, të cilat mbeten kriteret kryesore për ne. Vërtet mund të ketë një dyndje të madhe lojtarësh të ardhur me dëshirën e mirë për të qenë pjesë e Kamzës për sezonin e ri. Midis tyre kërkojmë edhe disa lojtarë të dalë nga ekipi zinxhir i klubit të Kamzës. Të gjithë të ardhurit, që do të jenë të pranishëm nga dita e hënë, do të futen në një proces seleksionimi njëjavor. Do të ketë një staf teknik që do të përzgjedhë lojtarët që do të pëlqehen dhe më pas do të hyhet në negociata për të lidhur kontratë. Ky ishte mendimi dhe vendimi i trajnerit Ndreu dhe stafit të tij teknik. Kamza është një ekip i hapur dhe luajal që mund të ketë vend për çfarëdolloj lojtari. Ne kërkojmë që këta futbollistë që vijnë për seleksionim ose siç mund t'i quajmë të ardhurit të bëjnë diferencën nga ata aktualët, pse jo dhe më tej, pasi edhe synimet e objektivat e ekipit tonë do të jenë ambiciozë në sezonin e ri, ku kërkohet një skuadër që t'i mbijetojë Superiores, por edhe të jetë konkurruese. Mendoj se me lojtarët që presim të na vijnë nga merkatoja, por edhe gjatë kësaj jave, ekipi do të kompletohet dhe formatohet në mënyrën më të mirë të mundshme dhe më 2 korrik skuadra të jetë e gatshme për të nisur fazën përgatitore", ka mbyllur Ndreu. Abdulla Dushku