Milani, gafë me federimet përpara Ligës së Europës
E mërkura, afati i fundit për të regjistruar një lojtar, Bilja favorit ndaj Bonuçit
Leonardo Bonuçi dhe Lukas Bilja nuk janë përfshirë në listën e Milanit për ndeshjet e turit të tretë të Ligës së Europës. Lajmi që u bë publik nga Marko Fasone shqetësoi jo pak tifozët, pasi ishte e paqartë mënyra se si krerët kuqezinjtë kishin gabuar për sa u përket procedurave. Me kthimin e skuadrës nga turneu aziatik, administratori konfirmoi se as Bilja dhe as Bonuçi nuk do të jenë pjesë për shkak të kohëve teknike të UEFA-s. Duke parë arritjet në kohë rekord të marrëveshjeve për transferimet e tyre, kuqezinjtë nuk patën mundësi të dorëzonin garancinë monetare që UEFA kërkon për t'i federuar në kompeticionet e saj. Konkretizimi i marrëveshjeve mes klubit dhe lojtarëve ka qenë jashtë afatit të përcaktuar nga UEFA për regjistrimin e lojtarëve dhe, për pasojë, Montela nuk do të ketë në dispozicion dyshen e sapoafruar në merkato. Bonuçi, ashtu si dhe Bilja mund të përfshihen në listë në raundin pasardhës, në qoftë se Milani kualifikohet. Kjo listë duhet dorëzuar deri më 10 gusht. Në rast impenjimesh përpara asaj date, si në rastin e Milanit, klubet që dëshirojnë të përfshijnë lojtarë në listë duhet të dorëzojnë një garanci ekonomike që përkon me 20 për qind të shumës, e cila është paguar për lojtarin në fjalë.
"Djalli" e ka një rrugëdalje
Në lidhje me këtë problem ekziston edhe një nen përjashtues, i cili i mundëson Milanit që, deri të mërkurën në mbrëmje, të dorëzojë emrin e futbollistit të fundit që do të shtojë në listën për federim nga ana e UEFA- s. E vetmja detyrë e kuqezinjve është të plotësojnë dosjen e lojtarit që duan të regjistrojnë, duke përfshirë edhe garancitë bankare të rastit. Për argjentinasin duhen katër milionë euro, ndërsa për Bonuçin shifra vërtitet te 8 milionë euro, por administratori Fasone ka saktësuar se më shumë se çështje ekonomike, është një problem kohor. Cilado qoftë zgjedhja e drejtuesve kuqezi, me shumë mundësi, pritet që zgjedhja të bjerë mbi Lukas Biljan duke parë mungesat në mesfushë të skuadrës së Montelës. Montolivo nuk jep garanci fizike, për shkak të dëmtimit të lehtë të pësuar në ndeshjen ndaj Bajernit, ndërsa Lokateli dhe Sosa, me sa duket, nuk e kanë bindur trajnerin. Reparti i mbrojtjes ka më shumë alternativa për
ndeshjen ndaj romunëve të Kraiovës. Jo se Bonuçi nuk do të ishte i nevojshëm, por duke ditur nevojat e kuqezinjve, një mesfushor është aktualisht më i dobishëm se sa një mbrojtës, pasi në repartin e prapavijës bollëku nuk mungon.