Humbet Juventusi, e “shkund” Nejmari
Dopietë e brazilianit, torinezët zgjohen në pjesën e dytë
FQ. 16
Një super Nejmar shtrin Juventusin në daljen e parë sezonale për djemtë e Masimiliano Alegrit. Në ndeshjen e parë të turneut "International Champions Cup", në Nju Jork, spanjollët fitojnë 2- 1: dopietë e brazilianit, i shërbyer në mënyrë perfekte nga Mesi, ndërsa për bardhezinjtë goli mban firmën e Xhorxho Kielinit, me një goditje me kokë pas një goditje këndi në fillimin e pjesës së dytë. Për kampionët e Italisë u panë në fushë jo vetëm Dibala dhe Higuain, por edhe blerjet e reja si Kosta, De Shiljo, Shezni apo edhe Bentankur. NEJMAR SPEKTAKOLAR
Nejmarit i mjafton një pjesë loje për të shtrirë në tapet Juventusin e Alegrit. Aspak i turbulluar nga zërat e merkatos, që tashmë e shohin fare pranë PSG-së, braziliani ofron 45 minuta të nivelit spektakolar, duke realizuar dopietën që vlen fitoren 2-1 të Barcelonës. Në "MetLife Stadium", kuqeblutë zbresin në fushë pa Luis Suarezin, ndërsa Alegri pa Dibalën dhe Higuainin, duke ia dorëzuar sulmin Manxukiçit, të mbështetur nga Lemina, Bentankur dhe Sturaro. Por skuadra e stërvitur tashmë nga Valverde luan në ritme shumë të larta dhe për të zhbllokuar sfidën i mjaftojnë 15 minuta: Nejmar shkëmben me Alkaserin, përpara se të dërgojë topin pas shpatullave të Bufonit. Braziliani do të përsëritet edhe 11 minuta më vonë me një të djathtë precize, pasi kaloi si birila thuajse të gjithë mbrojtjen bardhezi, një numër prej "cirku", i cili ekzaltoi mbi 82 mijë të pranishmit në stadium.
KIELINI NUK MJAFTON
Në pjesën e dytë, me Juventusin në disavantazh 20, trajneri Alegri vendos të hedhë në fushë "armatimet" e rënda: Higuain, Dibalën, Aleks Sandron dhe Duglas Kostën. Paulo, me freskinë e tij, i ndryshon fytyrën Juves, duke realizuar disa numra teknikë që meritojnë duartrokitjet nga tribunat njujorkeze dhe i krijon shumë probleme mbrojtjes së Barçës. Dhe pikërisht pas një aksioni personal të Dibalës, të mbyllur me një goditje këndi, vjen edhe shkurtimi i rezultatit nga kampionët e Italisë, me Kielinin që me kokë mposht Ortolan. Juventusi duket më i karikuar dhe shtyn me forcë përpara, por Higuain, që ka në këmbët e tij goditjen e golit të barazimit, e dërgon sferën mbi traversë. Pa dyshim që paraqitja e pjesës së dytë ishte shumë herë më e mirë për "Zonjën e Vjetër" pas zbritjes në fushë të dyshes argjentinase, të cilët presin aktin e radhës më 26 korrik, në Majemi, kundër PSG-së.