Lihtenshtejni “kurban”, Panuçi na bind në Maqedoni
Trajneri italian debuton me fitore, vulosin Roshi dhe Agolli
Kristian është një emër katolik që nuk ka lidhje me Kurban Bajramin, festa që po kremtohet ditët e fundit nga komuniteti mysliman në Shqipëri dhe në mbarë botën. Megjithatë, në debutimin e trajnerit të ri italian të Kombëtares shqiptare, kurban duhet të bëhej Lihtenshtejni. Panuçi e nisi me fitore, duke dhënë në njëfarë mënyre edhe një mesazh pozitiv në ditët kur në vendin tonë kanë shpërthyer polemika për çështjet fetare. Kombëtarja është ajo që i bashkon të gjithë, edhe pse Shqipëria njihet një vend ku mbi të gjitha ekziston toleranca fetare. Nëse Lihtenshtejni u bë kurban, tashmë trajneri i ri kuqezi duhet të na bindë në një ndeshje që është realisht testi për skuadrën që drejton. Kundër Maqedonisë është nga ato takime që e tejkalon edhe planin sportiv. Kundërshtari e ka dërguar ndeshjen në një stadium të ndërtuar rishtas nga zori, duke evituar arenën e Shkupit, aty ku impianti mund ishte në masën 80% kuqezi. E, megjithatë, të martën është prova e vërtetë e Panuçit dhe kuqezinjve për të arritur atë objektiv në një grup me dy "big" si Spanja dhe Italia. Duke lënë pas Izraelin, Maqedoninë dhe Lihtenshtejnin, Shqipëria e ka kryer misionin në grupin ku kualifikimi ishte i pamundur. NDESHJA
Vuajmë 54 minuta për të thyer Lihtenshtejnin, por fitojmë 2-0 përballë një kundërshtari që "detyroi" portierin Etrit Berisha të ishte në rolin e spektatorit thuajse gjithë ndeshjen. Kristian Panuçi debuton me tri pikë në krye të Kombëtares shqiptare, në një sfidë të luajtur në një portë dhe që u zhbllokua vetëm në pjesën e dytë. Ndodh shumë rrallë që Shqipëria të ketë zotërimin e topit në masën 72% gjatë pjesës së parë dhe 68% për takimin në total. Me skemën 4- 3- 3, ku Azdren Llullaku në majën e sulmit kishte mbështetjen e Odise Roshit në të djathtë dhe Eros Grezdës në të majtë, kuqezinjtë duhet të "shpiknin" diçka
për të thyer murin e Lihtenshtejnit. Loja përqendrohet në krahun e djathtë, me Roshin shumë aktiv, por me shënjestrën jo të duhur. Llullakut i jepet një shans i artë për të shënuar, ndërsa më pas Basha krijon iluzionin e golit me një goditje nga jashtë zone.
Minutat kalojnë shpejt, me Lihtenshtejnin që mbron me 10 lojtarë. Memushaj bëhet protagonist i thuajse çdo goditjeje standarde, por goli nuk duket edhe kur kuqezinjtë krijojnë aksione model si të minutës 44. Grezda del i vetëm pas asistit të Llullakut, por
portieri i mohon një gol të sigurt. Këtu mbyllet fraksioni i parë, me Shqipërinë që e ka të vështirë të gjejë rrugën e rrjetës. GOLAT
Kërkohej një skuadër e duruar, por pas çdo minute që kalonte nervozizmi shtohej te kuqezinjtë. Pas pushimit, ekipi
është i tëri në sulm, por bëhet i lexueshëm me aksionet nga krahët. Gjithsesi, Hysaj dhe Roshi bëjnë diferencën në krahun e djathtë. Sinjalin e parë e jep Llullaku me një veprim fantastik, por goli vjen pas një goditjeje nga këndi. Basha harrohet i lirë në zonë, gjuan tokazi dhe Roshi, i ndodhur në kohën dhe vendin e duhur, shtyn topin në rrjetë. Çlirim kuqezi pas 54 minutash dominim dhe vuajtje për golin. Gjithçka thjeshtësohet më pas, ndërsa Panuçi
bën lëvizjen e parë, duke aktivizuar Kukelin në vend të Memushajt. Goli i dytë nuk vonon dhe është një leksion që vjen nga kapiteni Ansi Agolli. Hysaj kroson nga e djathta dhe mbrojtësi i majtë bën një kryevepër me këmbën jo të preferuar (djathtën), duke e dërguar topin në rrjetë. Më pas, shfryrje dufi me tifozët që ndoshta i kujtojnë moshën. Në lojë futet edhe Hyka me debutuesin Ahmedi, ndërsa shanset janë për golin e tretë, por gjithçka do të mbyllej 2-0.