Rrebesh në Zagreb, ndërpritet Kroaci-Kosovë
Vendoset sot, Ujkani: Kroatët nuk donin të luhej
Shiu shtyn ndeshjen. Sfida e djeshme mes Kroacisë dhe Kosovës, e ndërprerë në minutën e 22-të për shkak të kushteve të vështira të fushës si pasojë e shiut të rrëmbyer, do të vendoset sot se kur do të luhet. Ka shumë diskutime dhe alternativa për takimin e ndërprerë në mesin e fraksionit të parë, por ka shumë pak gjasa që ndeshja të rinisë sot. Megjithatë do të jenë përfaqësuesit e UEFA-s me ata të të dyja klubeve që do të vendosin zyrtarisht sot se kur do të luhen minutat e mbetura të sfidës së djeshme. NDËRPRERJA
Takimi nisi në kushte të vështira. Fusha në një pjesë të madhe të saj ishte e mbuluar me ujë dhe terreni ishte i papërshtatshëm për një takim normal. Shiu që kishte nisur prej disa orësh në Zagreb dhe vazhdonte me intensitet të lartë edhe kur nisi takimi, e rëndoi edhe më shumë terrenin. Në kushte të tilla, gjyqtari Stefan Johaneson vendosi që ta ndërpriste takimin për disa minuta. Fillimisht, arbitri diskutoi me kapitenët e të dyja ekipeve dhe komisionerët e UEFA-s dhe vendosi që sfida të ndërpritej për 10 minuta. Por shiu
vazhdonte të binte me të njëjtin intensitet, në një kohë që kushtet e fushës mbetën po ato. Në këtë mënyrë, u vendos që takimi të ndërpritej aty.
VENDIMI
Për fatin e ndeshjes së ndërprerë do të vendoset sot
se kur do të luhen minutat e mbetura. UEFA së bashku me përfaqësuesit e të dyja ekipeve do të diskutojnë sot për datën se kur do të luhet ndeshja. Duket se e sigurt është që takimi nuk do të rinisë sot. Portali kroat, index.hr, shkruan se janë dy opsionet se kur
mund të rinisë sfida. Opsioni i parë sipas tyre është sot paradite, pasi Kroacia udhëton drejt Turqisë, kurse Kosova drejt Shkodrës. Opsioni i dytë është pas përfundimit të të gjitha ndeshjeve kualifikuese, pra në mesin e tetorit ose në nëntor.
UJKANI
Kapiteni i përfaqësueses së Kosovës, Samir Ujkani, nëpërmjet një deklarate pas vendimit të marrë nga zyrtarët që ndeshja Kroaci-Kosovë të ndërpritet, ka qartësuar përfundimisht situatën. 29vjeçari nga Vuçitërna tregon
se ishin lojtarët kroatë ata që insistuan që sfida të ndërpritej. "Ndeshja është shtyrë. Ne synonim të vazhdonim, por kroatët insistuan për jo. Frika ishte më shumë për dëmtime. UEFA do të vendosë nesër (sot) për datën e kësaj ndeshjeje", ka thënë Ujkani.