Maqedonia shtang Izraelin, Pandev vendos sfidën
Sulmuesi veteran i jep fitoren përfaqësueses së tij
Maqedonia ka surprizuar Izraelin në sfidën e djeshme të luajtur në Tel Aviv. Përfaqësuesja fqinje ka fituar 1-0 me golin e veteranit Goran Pandev. Një përballje e luftuar fort deri në momentet e fundit. Takimi është zgjidhur nga një asist i Elmas dhe një goditje perfekte e sulmuesit maqedonas në zonë.
NDESHJA
Loja nis e qetë dhe janë izraelitët më kërkues në fushë. Vendësit mundohen të krijojnë hapësira duke sulmuar nga krahët, por e kanë të vështirë të gjejnë golin. Nga ana tjetër, maqedonasit i kushtojnë më shumë rëndësi mbrojtjes dhe janë të kujdesshëm. Pjesa e parë nuk prodhon shumë dhe mbyllet në barazim pa gola. E dyta nis me izraelitët më agresivë në fushë që kërkojnë me ngulm golin e avantazhit. Por, sa për meritë të mbrojtësit dhe portierit mik, ashtu edhe të nxitimit të vendësve, rezultati mbetet i pandryshuar. U duk se takimi do të mbyllej në barazim, pasi maqedonasit mbrohen mirë dhe duket se janë të kënaqur me një pikë. Por, në të 73-ën, është Elmas që jep një asist perfekt nga rreth 35 metra për Pandev në zonë, i cili kontrollon topin, godet me të majtë dhe shënon. Maqedonia kalon në avantazh atëherë kur nuk pritej. Vendësit nervozohen dhe
kërkojnë të shënojnë me të gjitha mënyrat, por nuk ia arrijnë qëllimit. Maqedonasit janë të kujdesshëm dhe arrijnë ta ruajnë rezultatin deri në vërshëllimin përfundimtare. Një fitore shumë e rëndësishme për Maqedoninë, e cila ngjitet në kuotën e gjashtë pikëve, tri më pak se Izraeli. Tashmë, Maqedonia do të përballet me Shqipërinë në
sfidën që do të luhet të martën në Strumicë, në orën 20:45. Një sfidë shumë e rëndësishme për të dyja përfaqësueset që do të synojnë të marrin maksimumin. Pas ndeshjeve të djeshme, mbetet gjithçka e hapur për sa i përket luftës për vendin e dytë që të çon në "play-out". Ndërsa Spanja ka blinduar vendin e parë.