Laçi i falet Uzunit, Kamza zyrtarizon afrimin e dy rusëve

Sulmuesi Simonov dhe mesfushori Khatsukov

Laçi dhe Kamza e kanë mbyllur fazën përgatitore me ndeshjen miqësoren që zhvilluan dje mes tyre. Takimi u fitua 1-0 nga Laçi dhe golin e vetëm të takimit e shënoi Uzuni i ardhur te kurbinasit gjatë merkatos nga Apolonia. Ndërsa Kamza ka zyrtarizuar dje afrimin e dy lojtarëve rusë, të cilët prej kohësh kanë qenë në provë. Sulmuesi i qendrës Dimitri Simonov dhe mesfushori i majtë Khasan Khatsukov me sa duket e kanë bindur trajnerin Ndreu, i cili i aktivizoi në testin e fundit ndaj Laçit në pjesën e dytë. Të dy ekipet u përballën për herë të dytë gjatë kësaj vere, ku edhe më parë kanë qenë laçianët ata që kanë fituar, në shifrat 2-1, por në atë sfidë Kamza ishte në hapat e para të formatimit të grupit. Ndeshja nis e bukur për kamzalinjtë, të cilët bëhen agresivë me anë të ish- sulmuesit të Shkëndijës së Tetovës, Demir Imeri. Pjesa e parë ka qenë më e mirë për kamzalinjtë, por 45 minutat mbyllen në barazim 0-0. Kamza e nis pjesën e dytë me ndryshime nga porta deri në sulm, ku trajneri Ndreu provoi të gjithë lojtarët që kishte në dispozicion. Ndërsa laçianët vetëm pas minutës së 60të nisin me ndërrimet. Edhe pjesa e dytë nis vrullshëm për Kamzën, që e mbyll kundërshtarin në gjysmëfushën e vet. Me futjen e Vatnikajt gjallërohet sulmi i Laçit

dhe në minutën e 68-të, ish-sulmuesi i Partizanit shërben bukur për Uzunin që ndëshkon kamzalinjtë, 10 për Laçin. Pas golit, kurbinasit kanë edhe dy raste të tjera, por shtylla i vjen në ndihmë Kamzës dhe gjithçka mbyllet me golin e Uzunit. Pas ndeshjes, trajneri i Laçit, Stavri Nica, u shpreh:

"Skuadra është pothuajse gati dhe shikoj që po funksionon mirë. Miqësorja na shërbeu për të parë dhe rregulluar edhe disa mangësi. Gjatë javës që vjen, ne do t'i përkushtohemi ndeshjes së radhës, ku synohet që të luajmë bukur dhe të marrim pikë në start ndaj Partizanit". Abdulla Dushku