Mungon La Kamera, shansi i Bardhit që ta nisë si titullar
Koha e pakët në dispozicion nuk i jep mundësi stafit teknik të Partizanit që të bëjë shumë eksperimente gjatë përgatitjes për ndeshjen e radhës me Luftëtarin. Në dallim nga seanca e së premtes, dje përgatitjet janë zhvilluar pasdite në Kamzë dhe stafi i ka angazhuar të gjithë lojtarët e pranishëm me ngarkesë të plotë. Mbrojtësi Renaldo Kalari u ça në vetullën e majtë në ndeshjen ndaj Teutës dhe iu deshën 5 qepje për të mbyllur plagën. Gjithsesi, ky lëndim nuk është bërë pengesë që mbrojtësi të përgatitej dje normalisht me ekipin. Fillimisht u tha se dëmtimi mund ta mbante Kalarin larg ndeshjes së nesërme, por tani mbetet në dorë të stafit mjekësor për aktivizimin. Për Luftëtarin trajneri ka të pezulluar Xhovani La Kameran, i cili ka plotësuar numrin katër të kartonëve të verdhë. Duke ditur këtë mungesë nga kartonët dhe problemet e mbartura me të dëmtuarit, stafi ka nisur të ideojë formacionin e mundshëm për nesër. Pak a shumë pritet të luhet si në pjesën e dytë me Teutën. Mungesa e La Kameras i jep mundësi Bardhit që të jetë titullar ndaj gjirokastritëve, por me spostime pozicionesh. Nga ajo që u pa dje, Adorjan mund të formojë treshen e mesfushës së bashku me Vilën dhe Bathën, ndërsa Bardhi mund të pozicionohet si sulmues i djathtë. Gjasat janë që edhe kësaj radhe mbrojtja të ndryshojë, pasi mbetet një repart që nuk po gjen stabilitet. Duke parë edhe dëmtimin e Kalarit, Kotobelli pritet të jetë në të majtë, Malota dhe Krasniqi parashikohen në qendër, ndërsa Progni është në avantazh para Selvaxhios. Gjithsesi, seanca e sotme mund të thotë më shumë sa i përket formacionit anti-Luftëtar.