Lushnja sfidon korçarët me Fation Sefën
Sulmuesi rikthehet në stadiumin ku është shpallur kampion në sezonin 2014-2015
Pas seancës së djeshme, lushnjarët kanë udhëtuar drejt Korçës dhe në mbrëmje janë akomoduar në qytetin juglindor. Te Lushnja do të mungojë portieri Spaho, që është i skualifikuar, ndërsa mbrojtësi Xhafa dhe mesfushori Branica janë të dëmtuar e nuk do të jenë për një kohë të gjatë. Lushnjarët ndodhen në vendin e fundit me dy pikë dhe luajnë ndaj kryesuesve të kampionatit me 13 pikë. Një transfertë e vështirë për verdhëjeshilët, në kushtet e mungesave. Gjithsesi, skuadra e Banos është përgatitur për një ndeshje të mirë. Një paraqitje dinjitoze është ajo që kërkohet nga drejtuesit e Bashkisë dhe të klubit. Ndërkohë, futbollisti me shiritin në krah, Fatjon Sefa, luan me statusin e ish-it, teksa është shpallur kampion me Skënderbeun në sezonin 2014-2015. Pas këtij edicioni sulmuesi 33-vjeçar luan për tri sezone radhazi te skuadra e qytetit të tij, ku edhe në këtë edicion është kapiteni i verdhëjeshilëve. Lushnja nuk ka arritur asnjë fitore në pesë transfertat e fundit në stadiumin "Skënderbeu". Verdhëjeshilët njohin dy barazime dhe tri humbje. Barazimi i fundit është arritur më 6 shtator 2005, me golat e Mërtirit për bardhekuqtë dhe Roland Dervishit për verdhëjeshilët. Ndërsa humbja e fundit i përket 29 shtatorit të 2013-s, kur Skënderbeu fitonte 2-0 ndaj Lushnjës me golat e Shkëmbit dhe Pejiç. GJOBA - Klubi lushnjar është gjobitur me 1 milion lekë të vjetër nga Komisioni i Disiplinës, që në ndeshjen e parë të luajtur në shtëpi. Selia e verdhëjeshilëve përmes një deklarate për gazetën "Panorama Sport", të dhënë nga sekretari i klubit, Irakli Zaka, sqaron: "Kemi marrë një dënim në vlerë monetare për ofendimet që kanë bërë tifozët në drejtim të gjyqtarëve gjatë ndeshjes Lushnja- Kukësi. Gjykimi i keq u bë shkak që të kishte edhe momente acarimi të shoqëruara me ofendime në kor. Për këtë jemi dënuar me gjobë. Dënimi nuk ka të bëjë me dëmtimin e fizioterapistit të Kukësit, Erion Baçova. Ai dëmtim erdhi nga jashtë dhe kjo nuk është përgjegjësi e klubit. Erdhi nga një sektor i stadiumit që është i mbyllur dhe do të jetë i tillë deri në fund të sezonit", thuhet në deklaratën e klubit lushnjar.