Luftëtari, ikën trajneri Fernandez
Në stol mbetet Kurbelo, kushti i presidencës është 5 pikë në 3 ndeshjet e radhës me “bigët”
Ndodhi ajo që kishte paralajmëruar "Panorama Sport". Daniel Fernandez nuk është më trajner i Luftëtarit. Pas një takimi me presidentin Grigor Tavo, dje uruguaiani është përshëndetur me skuadrën, që e drejtoi vetëm dy muaj. Në javët e fundit Fernandez ka pasur kontradikta të mëdha me ndihmësin e tij, Kurbelo. Mirëpo është fakt që edhe pse ai u prezantua nga klubi si trajner i parë, gjatë gjithë kësaj kohe, në konferencat për shtyp para dhe pas ndeshjeve, shfaqej vetëm Kurbelo. Fillimisht u tha se ishte një zgjedhje e vetë trajnerëve nga Uruguai, për shkak se Kurbelo përshtatej më mirë, duke qenë se zotëron disa gjuhë të huaja. Gjithsesi, me kalimin e kohës Fernandez dhe Kurbelo patën përplasje për sa i përket mënyrës së stërvitjes dhe zgjedhjeve në formacion. Gazeta mëson se drejtuesit e Luftëtarit i kishin vendosur ultimatum stafit që të sheshonin marrëdhëniet mes tyre, pasi në të kundërt, vendimi për të dy do të ishte drastik. Gjithsesi, pas humbjes me Kamzën dhe publikimit të lajmit në "Panorama Sport" se uruguaianët janë përçarë, menjëherë presidenti Tavo thirri në një takim urgjent Fernandezin. Kësisoj, palët arritën një marrëveshje për prishje me mirëkuptim të kontratës. Mirëpo nuk ndodhi e njëjta gjë me zv.trajnerin Luis Kurbelo. KONFIRMIMI
"Po, është e vërtetë që jam larguar. Ishte një marrëveshje me presidentin. Gjetëm gjuhën e përbashkët që bashkëpunimi ynë të mos vazhdojë. Deri të hënën do të kem mbyllur gjithçka sa u përket çështjeve kontraktuale. Në respekt të presidentit Tavo, unë nuk do të flas për motivet e këtij largimi pa u zgjidhur përfundimisht kontrata. Arsyet do t'i mësoni në ditët e ardhshme. Ju falënderoj për bashkëpunimin", ka deklaruar ekskluzivisht për gazetën trajneri Fernandez, i cili tani pret konfirmimin e klubit për
zgjidhjen e kontratës, që i skadonte në muajin gusht të vitit të ardhshëm.
KURBELO I PARË
Luis Kurbelo do të jetë tashmë edhe zyrtarisht trajner i Luftëtarit. Uruguaiani që erdhi si ndihmës i Fernandezit në stolin bluzi, ka kohë që ka marrë në dorë frenat e skuadrës dhe kjo është e dukshme, jo vetëm në këshillat që ai jep gjatë ndeshjeve, por edhe rolin që ka në seancat stërvitore. Kurbelo do të ketë si ndihmës tashmë trajnerin e portierëve, Dritan Kristidhi, ndërsa në rolin e përgatitësit atletik vazhdon të jetë greku Kostas Kolcidhas. Klubi ka vendosur si kusht që në tri ndeshjet e radhës ndaj Partizanit, Kukësit dhe Skënderbeut, skuadra të marrë të paktën pesë pikë. Gjithçka mbetet për t'u parë, teksa nesër gjirokastritët luajnë ndaj të kuqve në "Selman Stërmasi".