Besëlidhja zhgënjen sërish, Burreli bëhet “mur”

Lezhjanët barazojnë, shpërdorojnë shumë raste

Zhgënjen Besëlidhja. Skuadra lezhjane, që synon ngjitjen në Superiore, ngec sërish në shtëpi. Përballë Burrelit, që është në vendin e fundit me vetëm një pikë, Besëlidhja nuk ka shkuar më shumë se një barazim pa gola. Ashtu si edhe sezonin e kaluar, lezhjanët vazhdojnë të gabojnë në ndeshjet në fushën e tyre dhe këtë e bëjnë përballë skuadrave jo shumë të forta. Ndeshja - Të parët që rrezikojnë janë vendësit në minutën e 2të me anë të Hepajt, por gjuajtja e tij devijohet nga gardiani mik. Përsëri këmbëngulin lezhjanët këtë radhë me anë të mbrojtësit të majtë Ndreca, që sapo futet në zonën mike dhe bëhet gati të gjuajë, është Mema që e bllokon. Në të 20ën ndryshon rrjedha e lojës, pasi janë matjanët ata që ndërmarrin një sulm me anë të Kurbneshit, që pason për Ujkën dhe ky i fundit sapo futet në zonën lezhjane, neutralizohet pastër nga mbrojtësi guineas, Olivier Dore. Por me kalimin e minutave, miqtë tërhiqen në mbrojtje, duke u bërë barrikadë para zonës së tyre. Në të 30- ën, Kamara lëviz mirë dhe shërben për Bangoura, që është i vetëm përballë Hilës, por gabon në goditje, duke e dërguar topin mbi traversë.

Ndonëse Besëlidhja për më shumë se 20 minuta e zotëroi fushën, nuk ia doli që të finalizonte saktë. Edhe pjesa e dytë nis me vendësit në kërkim të golit. Në të 67- ën është Besëlidhja që duhej të shënonte me anë të Milotit që zëvendësoi Frrokun, por shënjestra e tij

shumë pranë portës është e gabuar. Në dy raste të Besëlidhjes, u pretendua për penallti, por vetëm sa u ndëshkuan me kartonë të verdhë për simulim. Edhe pas pesë minutash shtesë, rezultati nuk ndryshoi dhe mbeti i bardhë, 0-0. Preng Gjikola