Çekiçi nderon Pogradecin, Shënkolli i dobët në transferta
Pogradeci është rikthyer te fitorja. Pas barazimit në Fier javën e kaluar dhe humbjes 3-0 që pësoi në fushën e vet me Tiranën dy javë më parë, liqenorët kanë marrë dje 3-pikëshin e radhës. Në ndeshjen e djeshme ndaj Shënkollit, liqenorët fituan 1-0 në një stadium të boshatisur për shkak të dënimit të tifozëve.
Ndeshja - Janë vendësit që rrezikojnë të parët me anë të Çekiçit, por miqtë mbrohen me shumë lojtarë. Është pikërisht ky futbollist që vë në lëvizje miqtë. Në minutën e 13-të, Kulli i Shënkollit me një aksion individual ka mundësi të shënojë, por goditja e tij përfundon jashtë. Loja bëhet edhe më e bukur, pasi fiton ritëm. Liqenorët janë afër golit, ndërsa miqtë preferojnë kundërsulmin. Megjithatë, goli i vendësve nuk vonon. Në të 24-ën është Lami që jep një asist për Çekiçin që godet saktë dhe shënon 1-0. Pogradeci e sheh veten në avantazh, gjë që reflekton në dëshirën për të pasur më tepër gola. Liqenorët bëhen tashmë zot të fushës dhe hidhen në gjysmëfushën mike ku Jahaj-Topllari kombinojnë bukur dhe Lame bëhet furnizues i përpiktë, por nuk ka më gola. Pjesa e dytë nis e shpejtë nga miqtë, të cilët krijojnë edhe rastin e parë me anë të Bakos. Kundërpërgjigjet Pogradeci me Lamen dhe Çekiçin, ku nuk mungojnë rastet e njëpasnjëshme. Në të 62-ën është përsëri Çekiçi në një ditë të mirë, i cili gjuan fort, por grushton portieri mik. Pas minutës së 70-të, loja baraspeshohet, ku miqtë hidhen në sulm, por portieri Mali është në gatishmëri të plotë. Pavarësisht rasteve, nuk ka më gola dhe ndeshja mbyllet me fitoren
1-0 të Pogradecit. P.Starova GOLI: Çekiçi 24' POGRADECI: Mali, Kllogjeri, Hysenllari, Pere, Pura, Lame, J.Liçkollari, Jahaj (Xh.Liçkollari 84'), Shyti, Çekiçi, Topllari (Mezini 83'). ( Në dispozicion: Totolaku, Hidri, Molla, Çerepi, Laçka). Trajner: F.Fetollari SHËNKOLLI: Rin. Danaj, S.Danaj, Rub.Danaj, Ceku, Selaçi, Gega, Kulli (Neka 53'), Pjetrushi, Luzi, Baku, Liçaj. (Në dispozicion: Hasanaj, Ramaj, Mashi). Trajner: R.Kulli KARTONË TË VERDHË: Liçaj 73', Rub.Danaj 82' GJYQTARË: E.Llapaj, R.Malaj, T.Kasaj, A.Stefa (Vlorë) VËZHGUES: Mikel Shestani (Tiranë)
DELEGAT: Altin Kovaçi (Elbasan)