Europiani në Durrës, Urso: Shqipëria gati edhe për Botëror
U zhvillua dje në pallatin e sportit "Ramazan Njala" të Durrësit ceremonia hapëse e Kampionatit Europian për të rinj dhe U23 që do të mbahet në këtë qytet nga data 15-22 tetor. Gjatë këtyre ditëve të rinj dhe të reja nga 37 vende të Europës do të sfidohen mes tyre në betejën për medalje. Në fakt nuk do të jetë çudi nëse do të bëhemi dëshmitarë të ndonjë rekordi, pasi pjesëmarrja e sportistëve elitarë premton shumë. Në total do të jenë 450 peshëngritës (femra-meshkuj), të cilët që prej orës 10:00 të ditës së sotme do të vihen përpara pedanës. I gjithë qyteti i Durrësit është i mbushur nga sportistë, banera dhe dashamirës të këtij sporti. Ceremonia e djeshme u çel nën motivet e muzikës tradicionale shqiptare me vajzat e shkollës së baletit të Tiranës që performuan në fillim. Më pas ishte radha e paradës së flamujve ku të gjithë pjesëmarrësit brohorisnin për flamurin e tyre. Më pas mbajtën fjalën përshëndetëse presidenti i FSHP, Elez Gjoza, presidenti i Federatës Europiane të Peshëngritjes, Antonio Urso, si dhe kryebashkiaku i Durrësit, Vangjush Dako. Zoti Gjozaj, duke dhënë garanci për mbarëvajtjen e aktivitetit, e vuri theksin te kushtet që u janë krijuar pjesëmarrësve. Presidenti i Federatës Europiane, Orso, u shpreh mjaft i kënaqur për organizimin dhe theksoi që ka premisa të mira që në të ardhmen në Shqipëri të organizohet edhe ndonjë kampionat botëror. Në fund të ceremonisë u shpërndanë medalje mirënjohjeje për figurën e të ndjerit Muhamet Malo, medalje që iu dorëzua djalit të tij. Nga ana tjetër, me po të njëjtën medalje u nderua edhe Asim Belinova. Roland Gjini