Ikardi: Prisni sfidë të zjarrtë, shkëmbej golin me fitore
Nga Argjentina tek Interi, me derbin në mendje dhe një kujtim të hidhur për të harruar...
Pasi theu tabunë "Milan" në derbin e 15 prillit të kaluar, Mauro Ikardi dëshiron të mos ndalet më dhe po përgatitet për një tjetër gol, por mbi të gjitha... për tri pikët. Përmbysja e kuqezinjve në fazën e dytë të sezonit të kaluar nuk është kapërdirë ende, madje nuk i pëlqyen as fotografitë që e portretizonin të gjunjëzuar në mesin e fushës mes lotëve, me sytë drejtuar fushës dhe, në sfond, lojtarët e Montelës që festonin për barazimin e papritur vendosur në sekondën e fundit të kohës shtesë. Prej asaj dite është planifikuar hakmarrja e kapitenit "të plagosur". FJALËT E KAPITENIT - I intervistuar nga mediat kineze, në një konferencë të dedikuar, kapiteni i Interit, Mauro Ikardi, është shprehur kështu për sa i përket derbit me Milanin, të programuar për sot në mbrëmje: "Të luash një derbi është një ndjenjë e mrekullueshme për gjithë qytetin dhe nesër (sot) do jetë një ndeshje e zjarrtë, edhe për mua që sapo jam kthyer nga një ndeshje kritike me përfaqësuesen. Objektivat e mia personale? Derisa skuadra fiton, ky do jetë objektivi që më bën të lumtur dhe goli im ka pak rëndësi. Jam kapiteni i Interit, ky është sezoni im i pestë këtu: derbi më bën ta ndiej më shumë peshën e përgjegjësisë. Me ndihmën e trajnerit dhe të stafit, jemi duke avancuar çdo ditë". THATËSIRË DHE... REKORD - Prej momentit që i është bashkuar grupit zikaltër, pas angazhimit me "Seleccion"- in e Argjentinës. Brenda tij Mauro ndien nevojën që duhet me patjetër t'i tregojë Sampaolit se e meriton një fanellë titullari në përfaqësuese. Ikardi dominon klasifikimin e sulmuesve në përqindjen e finalizimeve në portë (81%). Përveç këtij primati, Maurito ka edhe përqindjen më të lartë të realizimeve (38%). Derbi duhet të përfaqësojë kthesën për sezonin e tij dhe mbi të gjitha të përmirësojë "luftën" personale me Milanin (2 fitore, 5 barazime, 2 humbje dhe vetëm 1 gol kundër "kushërinjve"). Bilanci prej 84 golash në 153 paraqitje me Interin duhet azhurnuar, rikthimi i kapitenit pritet në derbi.