Strakosha: Dibalën e studiova, këshillat e babait më vlejtën
"Më ka thënë që gjithmonë të hidhem nga e djathta"
Ka përballë të ashtu quajturin "Mesi i ardhshëm" dhe në minutën e 97-të bëhet heroi i Lacios. Thomas Strakosha pret penalltinë në frymën e fundit dhe i jep skuadrës së tij një triumf historik në Torino. Gardiani i Kombëtares shqiptare çmend Italinë me paraqitjen e jashtëzakonshme ndaj kampionëve të Juventusit dhe i detyron këta të fundit të kalojnë një minikrizë. Pas Berishës në javën e fundit, këtë herë ishte portieri tjetër shqiptar që ndali Dibalën. Ai tregon momentet e 11-metërshit, sekretet e përgatitjes së sfidës dhe këshillave të babait të tij Foto. I thotë gjithmonë të hidhet djathtas dhe këtë herë qëlloi në shenjë...
E keni idenë se çfarë keni bërë?
Nuk e kam bërë vetëm unë. Mirëpo meritën maksimale e keni ju me pritjen e penalltisë...
Mendoj që është arritje në grup. E kemi bërë të gjithë si skuadër, bashkë me grupin, stafin dhe tifozët.
Çfarë menduat përpara penalltisë?
Mendova vetëm që barazimi nuk do të kishte qenë rezultati i drejtë për atë që dhamë në fushë. Sipas meje, kemi dhënë gjithçka në këtë sfidë. Duhet ta prisja patjetër penalltinë, sepse do të ishte mëkat nëse nuk e fitonim këtë ndeshje.
Si arritët ta prisni penalltinë e Dibalës?
Kam bërë pjesën time, por me ndihmën e Zotit.
Këshilla nga babai për penalltitë?
Si babai, ashtu edhe Grixhioni më kanë këshilluar që të hidhem nga e djathta dhe në atë moment atë gjë bëra.
E kishit studiuar më parë si godet Dibala?
Po, e kam parë edhe në të shkuarën për mënyrën si i ekzekuton penalltitë. E dija se ku duhet të shkoja në atë moment dhe arrita të pres atë penallti, më në fund.
Fitore e merituar apo me fat?
Në ndeshje të tilla vlen çdo aspekt. Megjithatë, na duhej edhe neve pak fat, pas atij momenti të pozicionit jashtë loje (goli i parë i Juventusit).
Ishte kjo ndeshja më e bukur në karrierë?
Nuk di ta them këtë, por sigurisht që është një nga 5 më të bukurat që kam luajtur. Sigurisht që e para vazhdon të jetë Superkupa e Italisë.
Lorik Cana i ka dhënë lamtumirën futbollit të luajtur…
Është një person i jashtëzakonshëm, përveçse një futbollist i shkëlqyer. Jepte gjithmonë këshilla të vlefshme në fushë.
Do të shkoni në Champions?
Dëshira është e madhe, por duhet të qëndrojmë me këmbë në tokë. Duke punuar, mund t'ia dalim. E rëndësishme është që ta mbyllim kampionatin në pesë vendet e para. Kjo do të ishte diçka e bukur. Kampionati është i gjatë dhe duhet të vazhdojmë kështu, sepse një rezultat negativ mund të ndryshojë gjithçka.