Vetëm 1 pikë, Barcelona s’e ha dot... ëmbëlsirën
Simeone “serviri pjatat”, por katalanasit nuk morën 3 pikë
Një pjesë dhe një pikë për kokë... Në "pjatën" e fortë të javës së tetë të kampionatit spanjoll, Atletiko dhe Barcelona ndahen në paqe. Skuadra e Simeones e nis mjaft mirë duke kaluar në avantazh me Saulin, por katalanasit vendosën baraspeshën falë Luis Suarezit. Më parë, kishin goditur shtyllën me Leo Mesin dhe kishin humbur një rast të artë për të shënuar në portën e Oblakut. Por, ky barazim sigurisht që vlen shumë sepse i lejon katalanasit të jenë pesë pikë më shumë sesa Reali dhe gjashtë më shumë se Atletiko dhe Sevija. Klimë e nxehtë për mbrojtjen e simboleve kombëtare në "Vanda Metropolitano". Ishte transferta e parë për blaugranët pas referendumit dhe kundërshtari nuk ishte i lehtë. Duhet të përballeshin me Atletikon e Madridit. Valverde zbret Andre Gomeshin në sulm përkrah Mesit dhe Suarezit, ndërkohë që Simeone gjithmonë me 4-4-2 klasik.
SAUL VENDIMTAR-Atletiko shënoi e para, por Barcelona ishte ajo që pati raste të shumta. Mesi humbi një gol të sigurt pasi kombinoi bukur me Suarezin, por topi shkon ngjitur me shtyllën. Por ulërimat e Simeones zgjojnë skuadrën dhe Grizman dy herë përhap panik në zonën e Ter Shtegenit. Nuk vonoi shumë dhe në minutën e 21-të, pas një aksioni Karrasko-Saul, ky i fundit godet bukur dhe e dërgon topin në rrjetë duke shpërthyer në festë tifozët e pranishëm në stadium. Barcelona kërkon të reagojë, por e mban topin në zonën e saj dhe nuk arrin të çajë dot mbrojtjen e ngritur mjeshtërisht nga "Çolo".
REAGIMI- Katalanasit provuan të ndryshojnë marshin e lojës në pjesën e dytë duke rritur
ritmin dhe krijojnë raste të rrezikshme. Suarez vë në provë Oblakun, por reagon mirë slloveni. Një minutë më vonë është Mesi që fatkeqësisht godet shtyllën, ndërsa Valverde zbret në fushë Serxhi Roberton dhe Deulofeun. Presingu i Barcelonës bëhet asfiksues për Atletikon
në 20 minutat e fundit, që nuk po dilte dot nga mesfusha. Për t'u hequr fitoren nga duart mendoi Luis Suarez, i cili përfitoi nga vendosja e gabuar e mbrojtjes dhe me kokë barazoi rezultatin. Në "Vanda Metropolitano" pllakos heshtja dhe minutat e mbetura janë shumë
pak për të reaguar, apo për të prodhuar ndonjë rezultat tjetër. Në fakt, Suarez ka dy raste shumë të mira, por nuk ia del t'i shfrytëzojë. Simeone tha që në shtëpinë e tij, miqtë duhet të hanë pjatat që u servir ai dhe nisur nga kjo i bie që Barcelona nuk e hëngri dot ëmbëlsirën.