Partizani, trajneri ringjall “të djegurit” e Iulianos
Stafi punë shtesë me Asanin, Filin, Sulejmanin e Kotobellin
Sulejman Starova nuk është i panjohur për futbollistët e Partizanit, pasi bëhet fjalë për një trajner që i ka stërvitur deri më 6 korrik, por që ka qenë pranë tyre edhe në këtë periudhë që nuk ishte në drejtim. Kështu që lojtarët nuk e kanë pasur të vështirë që të përshtaten me metodikën e punës së "Bobit", madje gjithçka ka nisur e qetë dhe me optimizëm. Që në start u pa ringjallja e "të djegurve" nga trajneri Mark Iuliano në fazën e parë. Në pamje të parë nuk shikoheshin fytyra të mërzitura në seancën e djeshme, madje buzëqeshja dhe batutat mbizotëronin mbi keqardhjen e pashprehur. Trajneri Starova e ka nisur punën në kushte jo të mira atmosferike, pasi reshjet e shiut kanë qenë të pranishme, por ajo që ra në sy ishte se të gjithë ishin të veshura me të zeza, uniformat për shi.
PËRGATITJET - Pjesën kryesore të seancës së djeshme e zunë përgatitjet me top, ku u aplikuan ushtrime dhe skema të ndryshme, me grup të përzierë. Angazhimi ishte në shkallën maksimale nga lojtarët, pasi me ardhjen e Starovës prishet në njëfarë mënyre hierarkia e vendosur në ekip nga stafi italian. Tani të gjithë konsiderohen në provë dhe ndryshimet në formacion pritet të ndodhin që nga transferta e 15 nëntorit në Laç. Pas katër muajsh te Partizani është rikthyer rituali i përfundimit të seancës stërvitore, ku lojtarët dhe stafi formojnë një rreth, krahëqafë, në
fushë duke u betuar për të bërë më të mirën për fanellën që mbajnë veshur. Në fund, trajneri ka punuar disa minuta më shumë me Jasir Asanin, Blerim Kotobellin, Alban Sulejmanin dhe Realdo Filin, që deri diku kanë qenë të anashkaluar nga stafi italian. Puna shtesë me këta lojtarë insistoi te perfeksioni
i krosimeve dhe vertikalizimeve të topave nga krahët te zona e portës. Duket qartë që trajneri Starova i ka në konsideratë këta lojtarë, nga të cilët kërkon shumë, ndaj ka punuar diçka më shumë në seancën e djeshme. Në krahasim me të shkuarën, dje Partizani ka qenë më i plotë në stërvitje.