Teuta, Magani u bën terapi psikologjike futbollistëve

Pas dy ditësh pushim, Teuta u është rikthyer përgatitjeve në terren për ndeshjen e radhës në kampionat ndaj Luftëtarit. Në seancën e parë stërvitore i gjithë grupi i futbollistëve ishte i gatshëm për trajnerin Gugash Magani, i cili nuk preferoi të flas shumë për atë që ka ndodhur, por vetëm për të ardhmen. Mungesa e vetme ishte ajo e portierit Elhan Kastrati, që është grumbulluar nga trajneri i Kombëtares U-21, Alban Bushi. Faza e parë u mbyll si mos më keq dhe peqinasi nuk ka dashur ta rëndojë edhe më tepër gjendjen psikologjike të lojtarëve. "Faza e parë ishte një dështim për ne, tani duhet ta harrojmë. Këto ditë duhet të punojmë fort për t'u rikthyer aty ku ne synojmë. Kam besim se gjithçka do të rregullohet dhe ndalesa e kampionatit është pozitive për ne. Duhet ta shfrytëzojmë këtë moment në mënyrë që të jemi gati për fazën e dytë, pasi të gjithë e kemi të qartë se gabimet nuk na lejohen më", mësohet t'u ketë thënë Magani futbollistëve. Seanca e djeshme u karakterizua nga vrapime rreth fushës dhe ushtrime të lehta, pasi lojtarët vinin nga dy ditë pushim. Sot ekipi do të punojë me dy seanca stërvitore, paradite dhe pasdite.

KRAHASIMI - Teuta është një "deja vu" e sezonit të kaluar. Klubi durrsak, edhe në fazën e parë të kampionatit të vjetshëm, grumbullonte po kaq pikë sa tani, 8. Ndryshimi i vetëm është se tani pozicionohet në vend të shtatë, ndërsa në sezonin e kaluar ishte e teta. Sa u përket golave, këtë kampionat është më mirë, pasi ka shënuar 11 herë, ndërsa ka pësuar më tepër se faza e parë e sezonit 2016-2017. D.Xhepollari