Lushnja, stërvitje në mes të qytetit
Nën drejtimin e trajnerit Dedja, lushnjarët i kanë vijuar përgatitjet e tyre me dy seanca stërvitore në ditë. Moti i keq dhe reshjet e shiut e kanë detyruar teknikun shkodran të verdhejeshilëve t'i zhvendosë përgatitjet në ambientet e "Lushnja Sport Center", në qendër të qytetit. Lojëra të ndryshme në palestër, kryesisht basketboll dhe vrapime në pistë. Gjithçka ka shkuar normalisht për lushnjarët me përjashtim të sulmuesit Brunild Pepa, që ka problem me shpinën. Ndërkohë që sot pritet t'i bashkohen skuadrës verdhejeshile Ruço dhe Shkullaku. Mungesa e një fushe stërvitore në kohë me shi, i ka bërë lushnjarët të stërviten në mes të qytetit. MONE - Mbrojtësi i krahut të majtë të lushnjarëve, Arbër Mone, ka zhvilluar një fazë të parë të plotë te skuadra verdhejeshile duke luajtur 810 minuta të plota. Në një prononcim për gazetën "Panorama Sport", mbrojtësi Mone tha se skuadra verdhejeshile është e përqendruar te përgatitjet në kuadër të fazës së dytë të kampionatit. Lushnja ndodhet në vendin e fundit me pesë pikë dhe situata në tabelë u vështirësua shumë pas humbjes me Luftëtarin. Lushnjarët do të luajnë një tjetër përballje të drejtpërdrejtë, pasi një javë më vonë do të jenë përballë Vllaznisë. "Po përgatitemi për fazën e dytë të kampionatit. Ekipi është në një pozicion të tillë që i duhen pikë. Kemi një ndeshje të rëndësishme me Vllazninë dhe synojmë rezultatin pozitiv. E rëndësishme është që të mos i largohemi grupimit të skuadrave që synojnë mbijetesën. Luajmë ndaj një kundërshtari që në këtë kampionat ka mundur vetëm skuadrën tonë. Besojmë që këtë herë të ketë ndryshme", u shpreh mbrojtësi fierak i verdhejeshilëve Arbër Mone. Alban Alushi