Turqi-Shqipëri, 2000 policë për miqësoren
Luks dhe ditë me diell, kuqezinjtë startojnë përgatitjet
Turqia do të presë Sh qipërinë në ndeshjen miqësore, më 13 nëntor, në Antalia. Dje, Këshilli i Sigurisë së këtij qyteti ka zhvilluar mbledhjen ku edhe ka përpiluar të gjithë planin e masave për mbarëvajtjen e takimit. Ndonëse bëhet fjalë për një sfidë miqësore dhe ku të dyja vendet kanë marrëdhënie shumë të mira, është menduar që në këtë sfidë të ketë të paktën 2000 forca policore.
MASAT
Dje, guvernatori i qytetit në Këshillin e Sigurisë ka vendosur në lidhje me planin e masave për ndeshjen e skuadrës kombëtare, si edhe për ndeshjen që do të luhet më 19 nëntor mes Antaliasporit dhe Fenerbahçes. "Këshilli i Sigurisë ka caktuar që të ketë të paktën 825 policë privatë (security) dhe 1200 policë që do të jenë të angazhuar për mbarëvajtjen e ndeshjes miqësore Turqi- Shqipëri, e cila do të luhet më 13 nëntor në Antalia. Gjithashtu, u caktua që në ndeshjen e 19 nëntorit mes Antaliasporit dhe Fenerbahçes, të ketë 12 500 policë, në sfidën e vlefshme për javën e 12-të", raporton "Yenimarmara" në Turqi. LUKSI
Skuadra Kombëtare është vendosur në Antalia për të zhvilluar përgatitjet në kuadër të sfidës miqësore ndaj Turqisë. Kuqezinjtë do të zhvillojnë seancat stërvitore në "Kundu Turizm Merkezi", që ndodhet fare pranë hotelit. Hoteli i kuqezinjve ofron kushte luksoze dhe komode. Krahas seancave stërvitore që kanë nisur dje me trajnerin Panuçi, lojtarët e Kombëtares kanë shanset që të shijojnë ditë me diell dhe temperatura të larta. Dje, skuadra ka zhvilluar seancën e parë stërvitore, ndërkohë që në orët e lira, kuqezinjtë kanë shansin të relaksohen dhe të pushojnë në kushte komode.