Interi, Spaleti ka ekip “të hekurt”
Nëntë pikë të rikuperuara nga disavantazhi, askush në Itali si skuadra zikaltër
Për herë të parë në gjashtë ndeshjet e luajtura në "San Siro" nuk ka fituar, nuk është më në vendin e dytë dhe për të tretën ndeshje radhazi ka pësuar të paktën një gol. Pas barazimit 1-1 me Torinon, ka të dhëna negative, por edhe shumë gjëra pozitive që trajneri Spaleti dhe drejtuesit e Interit i kanë mbajtur shënim me buzëqeshje. Kjo skuadër duket vite dritë larg ekipit të dy sezoneve më parë, që kur gjendej përballë vështirësive dorëzohej menjëherë dhe shpërbëhej. Nuk kishte forcë asnjëherë për t'u ringritur. Ky Inter është "i hekurt", ka karakter të fortë si trajneri i tij, nga i cili ka marrë esencën dhe dëshirën. Vetëm kështu shpjegohet përmbysja e madhe e një ndeshjeje që dukej e mallkuar duke parë pritjet e Sirigusë dhe gabimet përpara portës.
E PAMPOSHTUR - Të dhënat e përmirësimit, pas një të diele jo shumë pozitive, janë në ecurinë e deritanishme. Interi bashkë me Napolin janë ekipet e vetme që nuk kanë pësuar humbje në Serinë A, duke përfshirë edhe kompeticionet evropiane, atëherë zikaltrit janë ekipi i vetëm pa humbje. Deri tani Interi i Spaletit renditet përkrahë gjigantëve të Europës si PSG, Barcelona dhe Mançester Siti. Është e vërtetë që kanë pësuar gola më shumë sesa ekipet e sipërpërmendura, është e vërtetë që ndeshja e pësuar ishte vetëm ajo me Napolin në transfertë, por zikaltrit janë ekip i ri dhe kanë shumë për t'u përmirësuar. Handanoviç ka qenë i pamposhtur për shumë javë në fillim dhe pësoi vetëm 3 gola në 7 javët e para, ndërsa tani 6 në pesë javët e fundit. Spaleti duhet ta përmirësojë mbrojtjen, por në krahasim me vitin e kaluar kjo skuadër është shumë herë më e fortë. Me ekipet kryesuese të kampionatit nuk ka humbur asnjë ndeshje.
NUK DORËZOHET- Një tjetër statistikë pozitive është reagimi që ka skuadra kur ndodhet në vështirësi dhe ka pësuar gol. Goli i shënuar nga Eder ishte i dhjeti që Interi e ka shënuar në çerekorëshin e fundit të një ndeshjeje. Asnjë ekip nuk ka bërë më mirë se kaq, Napoli është ndalur në 6 gola dhe Juventusi në 5. Falë besimit deri në minutat e fundit, zikaltrit kanë arritur të rikuperojnë nëntë pikë nga situatat e disavantazhit, 1 me Torinon, 3 me Romën, 2 me Milanin, 2 me Veronën dhe një me Bolonjën. Statistika që japin shpresë që nuk do të ndodhin çudira si në sezonet e fundit...