Dembele rikthehet për Realin, Barça kishte akord me Mbapenë
Doktori finlandez, Sakari Orava, i cili kreu operacionin e Osman Dembelesë, nuk e ka përjashtuar 100% që francezi të rikthehet për klasiken kundër Realit të Madridit më 23 dhjetor. Orava i dha lajmin e mirë Barcelonës se në mes të këtij muaji, ish-talenti i Dortmundit do të mund të rikthehet në stërvitje me topin. "Riaftësimi i tij ka ecur më hapa më të shpejtë se parashikimet", tha ai për "Cadena SER". "Është e mundur që ai mund të luajë kundër Realit, por unë nuk mund ta jap me garanci të plotë. Nëse do të bënte një sforco të madhe, atëherë rrezikon që të ridëmtohet, por gjithçka do të jetë në rregull, nëse e marrim hap pas hapi. Askush në klub nuk dëshiron që të nxitohet për rikthimin e tij sepse rreziku është parësor dhe ai duhet të jetë minimal". Transferimi rekord i Barcelonës u operua në mesin e muajit shtator pas dëmtimit të rëndë që pësoi në kofshën e majtë në ndeshjen kundër Getafes. Koha e rikuperimit të tij u përcaktua 3.5- 4 muaj, por lojtari ka mrekulluar mjekët duke djegur afatet e riaftësimit. AKORD PËR MBAPENË - Sot mund të mos ishim duke folur fare për Demblenë, në rast se gjatë verës do të ishte realizuar një nga skenarët e merkatos së Barcelonës për të zëvendësuar
Nejmarin. Kanali televiziv francez "L'Equipe 21" zbulon se si Reali i Madridit ashtu edhe Barcelona bënë përpjekje deri në ditën e fundit të merkatos për të transferuar nga Monako Kilië Mbapenë. Ata këmbëngulin se 18-vjeçari gjeti edhe akordin me katalanasit në rast se marrëveshja e Monakosë dhe
PSG-së do të ishte minuar nga "Fair Play Financiar". Nëse UEFA do të kishte ndezur dritën e kuqe për operacionin e transferimit të lojtarit që erdhi në formë huazimi në "Parc des Princes" me të drejtë blerje në fund të sezonit, atëherë skuadra ku ai do të kishte përfunduar ishte Barcelona.