Çmenduritë vazhdojnë te femrat, edhe Hajvalia si Kinostudio

Futbolli i femrave vazhdon me çuditë. Pas Shqipërisë, "bëma" e radhës ndodh në Kosovë. Rezultate janë për librin "Guinness". Pas fitores së të shtunës 27-0 nga skuadra e Kinostudios me Bilishtin, në javën e 5-të të kampionatit shqiptar, një tjetër rezultat akoma edhe më i thellë dhe i paarritshëm deri më sot është regjistruar në ndeshjen e futbollit të javës së 12-të në kampionatin kosovar, ku skuadra e Hajvalias përveç spektaklit të dhuruar, kanë arritur të marrin dhe një fitore 38-0 kundër vajzave të "Vizionit" të Ferizajt. Por, më parë, skuadra jonë e Kinostudios ka arritur rezultatin më të thellë të regjistruar ndonjëherë në futbollin shqiptar të të gjitha moshave e kategorive. Më 21 prill 2017, 6 muaj më parë, gjatë sezonit të kaluar në kuadër të javës së 16-të, skuadra e Kinostudios mundi shkodranet e "The Door" 30-0. 11 futbolliste regjistruan emrin si shënuese gjatë kësaj ndeshjeje, ku Esi Lufo realizoi 8 gola dhe kamerunesja Maria Estel Gufon realizoi 6. Por, çmenduria te futbolli i femrave ka vijuar edhe gjatë këtij sezoni, kur Kinostudio mundi 27-0 dy ditë më parë skuadrën e Bilisht Sportit. Kanë qenë 8 futbolliste që kanë shënuar gol. Ndërkohë që një rekord më vete është për vajzën kosovare që luan me ekipin tonë Kombëtar, Cyme Lulaj, e cila ka realizuar 10 gola në këtë takim, ku veçohen dy golat e saj, i treti dhe i katërti që i ka shënuar direkt nga korneja. Ndërsa 5 gola ka shënuar afrikania nga Kameruni, Maria Atlok. Por, një rekord i paarritshëm është regjistruar në Kosovë gjatë ndeshjes HajvaliaVizion, ndeshje që ka përfunduar 38-0. Ndërsa Zelfije Bajramaj ka shënuar e vetme 18 gola. Kjo fitore për Hajvalisë theu rekordin e mëparshëm, kur Mitrovica pati fituar 26-0, ndaj Lirisë së Prizrenit.