Tre fantazistë për të ndalur agjërimin e golit te Milani

Suso, Çalhanoglu apo Bonaventura, është kjo dilema e fundit e Montelës në përpjekje për të ndalur Napolin. Ndoshta të tre së bashku nuk është një rreshtim që jep garanci në letër, por të paktën ekuacioni është i zgjidhshëm, megjithëse duhen bërë disa modifikime të rastit. Kundërshtari në këto raste ka rëndësinë e tij, por rezultati përmes lojës së bukur kërkon edhe doza të larta fantazie, çka mund të shtyjë Montelën të tentojë një treshe lojtarësh pas sulmuesit të vetëm. Me Suson të domosdoshëm, Çalhanoglunë që përfaqëson një investim të rëndësishëm dhe Bonaventurën që garanton sasi dhe cilësi, trajnerit kuqezi i mbetet të pikasë të sakrifikuarin, pasi dukshëm nuk ka vend për të gjithë të ardhurit e rinj. EKSPERIMENTE - Bonaventura ka qenë një ndër lojtarët kyç të sezonit të kaluar që, së bashku me Suson, i mundësuan Milanit një vend në Europë. Për momentin, ai është një ngjitës shumë i mirë i mesfushës me sulmin. Napoli nuk është rivali i duhur për të eksperimentuar tre fantazistë nga minuta e parë, ndaj Montela mund t'i besojë Bonaventurës në vend të Çalhanoglusë, i cili në ndeshjet e fundit nuk është se ka shkëlqyer. Turku ka ende vështirësi taktike, përveç atyre gjuhësore dhe konkurrenca me homologun duket e humbur në këtë moment. Skema me dy fantazistë, e përdorur deri më sot, ka ekuilibër dhe, nëse përdorimi i saj shihet si plan afatgjatë, në mos për tre, për dy fantazistë do të ketë gjithnjë vend. Triada e fantazisë është përdorur për disa minuta edhe ndaj AEK-ut në "San Siro", por rolet e secilit nuk ishin në një linjë siç synon ideja më e re e Montelës. Deri më tani, tekniku kuqezi ka ndryshuar disa formacione dhe rreshtime për të marrë më të mirën prej lojtarëve me peshë të ekipit, ndaj nuk përjashtohet një tjetër revolucion që të ndihmojnë edhe vijën e parë, sidomos tani që mbrojtja ka një aset të përcaktuar. POTENCIALI - Moduli 3- 5- 2 me kalimin e ndeshjeve ka pësuar një zhvillim, duke kaluar në 3- 4- 2- 1. Fantazisti i dyfishtë garanton një ekuilibër më të madh në fazën mbrojtëse dhe një vlerë të shtuar në aspektin ofensiv. Ky kalim modulësh do të plotësohet përfundimisht kur Milani të fillojë të shtojë numrin e golave në raport me goditjet në kuadrat. Siç thamë, deri tani rendiment të lartë ka garantuar vetëm Suso, teksa Bonaventura ka humbur shtatë ndeshje deri tani mes Ligës së Europës dhe Serisë A. Çalhanoglu vazhdon të ketë shanse me bollëk, e megjithatë nuk po arrin t'i shfrytëzojë, edhe pse është një goditës konstant i portave rivale. Jo gjithçka turku ka bërë ka qenë negative, sidomos në nivel goditjesh dhe rastesh të krijuara, por si mbajtës i numrit dhjetë prej tij pritet shumë më shumë. Teksa Montela kërkon dilema dhe jo probleme, fantazistët kuqezi presin shansin, cilësia e trumbetuar në muajt e fundit duhet të dalë në pah sa më shpejt.