Kukësi, në Kamzë luhet fati i Milinkoviçit
Për shumë arsye, fitorja ndaj kamzalinjëve është kthyer në detyrim për verilindorët
Kukësi vijon përgatitjet për ndeshjen me Kamzën, e cila luhet për llogari të javës së dhjetë në Superiore, ku pas pushimit të së dielës, dje kanë kryer një seancë stërvitore në Pezë. Humbja ndaj Korabit e ka rritur nivelin e alarmit te stafi teknik i Kukësit, kështu që me Kamzën presidenti Gjici nuk fal më. Vetëm fitorja pranohet ndaj Kamzës, përndryshe mund të jepen vendime drastike, duke rrezikuar seriozisht shkarkimin e trajnerit Milinkoviç dhe stafit të tij. Pas takimit me Flamurtarin, presidenti Gjici i dha besim teknikut serb, por dhe durimi ka një kufi. Humbja në miqësore ka acaruar Gjicin, i cili njihet për temperamentin e fortë dhe dëshirën e tij për fitore në çdo takim. Kjo sfidë e së enjtes është një takim prove, ndaj skuadra nuk duhet të gabojë. Arsyet për fitore ndaj Kamzës kalojnë edhe aspektin sportiv të dy klubeve, pasi siç e dimë presidenti Gjici kërkon sërish "hakmarrje", por këtë herë në fushë ndaj kryebashkiakut të Kamzës, Xhelal Mziu, i cili ka mundur numrin një të verilindorëve në garën për Bashkinë e Kamzës në vitin 2015. Madje, raporti mes këtyre dy personazheve është fare i ftohtë. Në ndeshjen e fazës së parë, e luajtur në Kukës ndaj Kamzës, Gjici dhe Mziu nuk janë përshëndetur, jo më të takoheshin. Kështu që, kjo është një arsye më shumë që skuadra verilindore duhet të fitojë tri pikët, pa harruar rivalin kryesor, Skënderbeu, q luan në Vlorë ndaj Flamurtarit. Ndaj shpresohet që këtë javë Kukësi të ketë një mundësi më shumë për t'u afruar me kreun. Kukësi, nën drejtimin e Milinkoviçit, ka arritur të fitojë 5 herë në 9 takime, ka humbur një takim ndaj Skënderbeut në shtëpi dhe ka barazuar në tre takime, dy prej të cilave në dy javët e fundit, ndaj Vllaznisë në Kukës e ndaj Flamurtarit në Vlorë. Sakaq, numri një i klubit pritet që para ndeshjes me Kamzën të mbledhë stafin dhe ekipin e t'ju bëj të qartë rëndësinë e tri pikëve në këtë takim. Pozitiv është fakti se për këtë sfidë grupi do jetë më i plotë pas rikthimit të Shametit dhe kapitenit Hallaçi, që dje ka festuar me shokët e ekipit ditëlindjen e 34-t. Skerdilaid Sulozeqi