Mblidhet Asambleja e Milanit: Nuk ka merkato në janar
49 mln € të tjera nga Jonghong Li, bursë dhe 14 sponsorë të rinj
Dje Milani zhvilloi Asamblenë sezonale për bilancet dhe projektet e klubit. Kjo mbledhje fillimisht ishte parashikuar për në tetor, por më pas u shty për efekt ndryshimesh në librat e kontabilitetit të shoqërisë.
Presidenti - Pas 27 milionë eurove të një muaji më parë, presidenti Jonghong Li ka respektuar edhe derdhjen e këstit të dytë për shtimin e kapitalit duke depozituar në arkat e klubit 22 milionë euro. Buxheti aktual që përfshin gjashtë muajt e parë të vitit 2017, shënon humbje prej 32.6 milionë euro, por gjithçka është brenda parashikimeve.
UEFA - Me vendimet e reja të
Asamblesë, Milani duhet të barazojë bilancin (të mos paraqesë humbje në buxhet) brenda vitit 2020. Edhe UEFA duket se e ka pranuar projektin kuqezi dhe, megjithëse nuk ka ende një përgjigje zyrtare, ajo pritet të jetë pozitive. Arkëtimet - Megjithëse buxheti shënon humbje, regjistrat financiare
të Milanit kanë pësuar jo pak përmirësim. Asambleja vuri në dukje një stanjacion që duket se do të zgjidhet brenda sezonit aktual. "Ngërçi" në këtë aspekt ka lidhje me pjesën burokratike, e cila në tokën kineze paraqet disa problematika të kapërcyeshme me kohën. Sezoni - Në nivel objektivash, nisja
e dobët e Serisë A nuk ka ulur pretendimet e aksionerëve kuqezi. Në fillim të kampionatit mendohej se kuota e 71 pikëve do të mjaftonte për të arritur një kualifikim në Ligën e Kampioneve, por me ecurinë e disa ekipeve, kjo kuotë është ngritur në 80 pikë gjatë Asamblesë. Sponsorët - "Audi" e "Adidas" mbeten sponsorë të përgjithshëm deri në fundi të sezonit. Asambleja duket se ka miratuar kontratat me sponsorët e rinj, që do të zyrtarizohen në fillim të vitit të ardhshëm kalendarik. Në 2018 gjithashtu në klub do të afrohen 9 sponsorë të tjerë. Stadiumi - Ambicia e klubit është pajisja me një stadium personal duke ndjekur modelin e Juventusit. Të ardhurat e një impianti personal do të ishin oksigjen i pastër për arkat e klubit, por diçka e tillë do të shihet si mundësi në vitin e tretë të presidencës kineze. Preferenca e Asamblesë do të ishte privatizimi i "San Siro"-s, por duhet mundur edhe konkurrenca e Interit.