Idrizi: Na fyen qytetin, ju tregoj fundin e botës

"E rëndë për ne, na kanë ndarë si qytetarë të dorës së dytë"

Sinan Idrizi ndihet i fyer nga deklarata e FSHF- së. Në një prononcim për "Panorama Sport", administratori i Flamurtarit ka theksuar se cilësimi që i bën institucioni i futbollit klubit vlonjat, duke përdorur shprehjen "paranoja periferike", është një fyerje ndaj qytetit të Vlorës. "Që nga ajo që thonë ' paranoja periferike konstante', e kupton statusin ku janë zotërinjtë. Ne jemi periferikët, ata patricët tanë. Na kanë ndarë si qytetarë të dorës së dytë. Kjo është fyerje e rëndë, ne jemi periferikë për ata. Përse këta zotërinjtë nuk na kanë kthyer përgjigje për luftën kundër informalitet, pasi u kemi dërguar shkresë zyrtare. Tani neve na cilësojnë si periferikë, si njerëz që vijmë nga malet. Nuk dua të fyej njeri, por këta janë udhëheqësit tanë. Në çdo studio televizive, në të gjitha ndeshjet komentohet ka apo s'ka probleme për Flamurtarin dhe në çdo ndeshje ka probleme. U kemi dërguar letër janë apo s'janë pjesë e informalitetit në futboll, të na e tregojnë këtë neve periferikëve,

paranojakëve, provincialëve, pasi sistemin e bëjnë vetë. Është fyerje e rëndë kjo. Ne jemi provincialë dhe këtu mbyllet ky cikël. Shyqyr që kanë gjetur kohën që në kthyen një përgjigje zyrtare, kjo është kryesorja. Ne ishim shumë dakord që ndeshja me

Skënderbeun të shtyhej për të shtunën. Isha i lumtur që kjo të ndodhte, pasi nuk doja një Skënderbe me mungesa. Doja në fushë edhe lojtarët e tyre që luajnë me Kombëtaren, që të maten forcat realisht në fushë. Nëse nuk do ta kërkonin korçarët shtyrjen, do ta kërkoja unë", deklaroi Idrizi. GJYQTARËT Administratori i klubit vlonjat është i bindur se gjykimi do të jetë kundër Flamurtarit. Sipas Idrizit, do të jetë fundi i botës, nëse arbitri tregohet korrekt nesër. "Unë them se do të jetë çudi nëse arbitri nuk jep vendime kundër nesh. Nuk i di shenjat e qametit, por një ndër shenjat e tij është nëse ndonjë arbitër do të jetë korrekt me Flamurtari. Nëse ndodh kjo, atëherë paska ardhur fundi i botës", ka thënë ndër të tjera kreu i klubit vlonjat, duke ironizuar me arbitrat. PRITSHMËRIA

Sinan Idrizi kërkon fitoren përballë Skënderbeut. Ai theksoi se ky është ekipi më i mirë që ka pasur Flamurtari, pasi këta lojtarë janë më shumë se vlonjatë. "Unë pres vetëm fitoren në ndeshjen me Skënderbeun. Ne kemi pasur lojtarë vlonjatë në ekip dhe ishim atje ku ishim, tani kemi këta që janë më shumë se vlonjatë dhe jemi këtu ku jemi. Ky është një ekip për marshallah. Kam shumë besim se skuadra do të bëjë më të mirën në takimin e radhës. Unë pres tri pikët me Skënderbeun, por edhe një lojë të bukur", përfundoi Idrizi.