Asnjë humbje në kampionat, Elbasani është për rekord
Elbasani do të synojë të marrë tri pikët e radhës ditën e sotme, teksa do të luajë në transfertën e Ersekës përballë Gramozit vendës. Tani që verdheblutë janë në vendin e parë, duan që të mos e lëshojnë më këtë pozicion, ndaj objektivi i vetëm do të jetë arritja e një tjetër fitoreje. Transfertat janë shumë të vështira në këtë kategori, për këtë arsye në Elbasan e kanë vlerësuar maksimalisht dhe e konsiderojnë si një ndeshje që ka vlerën e tri pikëve, edhe pse nuk kanë përballë një rival direkt. Morali në kampin verdheblu është i lartë pas fitores me Orikumin të shtunën, teksa këmbeu vendin e parë me këtë skuadër, meqenëse bëhej fjalë për një rival të drejtpërdrejtë. Elbasanasit deri tani janë skuadra e vetme që nuk kanë asnjë humbje në kampionat, për sa i përket skuadrave të Kategorisë së Dytë duke treguar se ndodhet me meritë në krye të klasifikimit. Gjithsesi, tani mbetet për t'u parë se sa do t'ia arrijnë të dalin me një fitore nga sfida e vështirë që do të luhet në Ersekë. Vladimir Mema