Lëv: Mëkat për Italinë, De Rosi u tregua burrë
Drejtuesi e përzuri nga emisioni, -vjeçari u acarua
Gjesti i Daniele De Rosit në "San Siro", i cili refuzoi që të zbriste në fushë duke ia "lënë" vendin e tij Lorenco Insinjes për faktin se Italisë i duhej më shumë një sulmues sesa një mesfushor si ai për të fituar, ky gjest i ka pëlqyer shumë trajnerit të Gjermanisë, Joakim Lëv, i cili duartroket futbollistin e Romës. "Kur mendoj për gjestin e De Rosit, mund të them vetëm se provoj respekt maksimal, por edhe për kampionë të tjerë si Bufon, Bonuçi... Burra me klas të pastër. E lexova dhe më pas edhe e ndoqa lajmin se De Rosi refuzoi që të zbriste në fushë, sepse skuadrës i nevojitej më shumë një sulmues, sesa ai. Për mua, një gjest i tillë tregon thjesht madhësinë e këtij lojtari, ndonëse është e trishtueshme që Italia të mos marrë pjesë në Botëror. Realisht, do të kisha dashur që ata të ishin me ne në Rusi, sepse kështu është edhe më e bukur sfida sportive". Si e përzunë nga emisioni? Në përfundim të përballjes miqësore mes kombëtares gjermane dhe asaj franceze, e cila u mbyll me barazimin 2-2 në stadiumin e Këlnit, trajneri gjerman Joakim Lëv ishte i ftuar në një emision televiziv për të folur për ndeshjen. Por, gjatë një pyetje nga gazetari, Lëv nuk është lejuar të përfundojë fjalët e tij, pasi është ndërprerë nga drejtuesi i emisionit. Në ato momente, rreth 9 milionë shikues ishin duke ndjekur emisionin "ARD Studio" për të dëgjuar edhe përshtypjet e trajnerit gjerman lidhur me përballjen miqësore me Francën, por gjithçka u mbyll shumë shpejt. Teksa Joakim Lëv ka qenë duke folur, prezantuesi i emisionit, Aleksander Boms, i ka thënë atij se: "Pa dashur t'iu ndërpres zoti Lëv, mendoj se duhet të shkoni për të dhënë konferencën për shtyp, ndryshe mund të pezulloheni nga Kupa e Botës. Megjithatë, ju falënderojmë për prezencën tuaj në studio". Menjëherë pas kësaj ndërprerjeje, Joakim Lëv nuk ka dashur të largohej, pasi nuk kishte përfunduar ende fjalinë që kishte nisur. Por ai ka ironizuar duke thënë: "Kam ende kohë për të folur, por nëse nuk doni të dëgjoni..." dhe kështu është larguar duke qeshur në shenjë ironie me drejtuesin e emisionit.