Kukësi, Milinkoviç ndëshkon Allën
Ndryshime në formacion para ndeshjes me Kamzën, çdo dështim shoqërohet me pasoja
Trajneri Milinkoviç dhe stafi i Kukësit u dhanë fund përgatitjeve në kuadër të ndeshjes me Kamzën. Fitorja ndaj Kamzës është detyrim, për shkak të garës me Skënderbeun, por dhe për shkak të konkurrencës që vetë presidenti Gjici ka pasur me homologun e tij, Xhelal Mziu, në sferën politike. Raporti ndërmjet Gjicit dhe Mziut është mjaft i ftohtë, madje i prishur. Kjo u pa edhe në sfidën që Kukësi fitoi në "Zeqir Ymeri" ndaj Kamzës, ku presidentët as nuk u përshëndetën e jo më të uleshin krah njëri-tjetrit. PASOJAT
Sakaq, presidenti Gjici ka urdhëruar që secili ta bëjë vetë punën që i takon në mënyrën më serioze të mundshme, pasi në të kundërt do mbajë kosto. Gjithashtu, trajneri Milinkoviç ka "vënë vath në vesh" ato çka presidenti Gjici i la porosi në mbledhjen mbas barazimit në Vlorë. Takim ku u kritikua loja e Albi Allës dhe vendimi i presidentit ishte që askush të mos luajë titullar nëse nuk jep atë që duhet, pavarësisht statusit. NDËSHKIMET Zbatimi i vendimit fillon që nga ndeshja me Kamzën, në të cilën Milinkoviç pritet të veprojë më dorë të hekurt. Nga ajo çka ka provuar dje, kuptohet se të penalizuarit pritet të jenë dy nga "yjet" e ekipit: Albi Alla dhe Besar Musolli. Allën e zëvendëson Rustem Hoxha, ndërsa rikthehet në pozicionin e tij Ylli Shameti. Fakti që mbrojtja ka pësuar 7 gola në 9 takime, ka bërë që trajneri të ndërhyjë, duke bërë shembuj. Çdo gjë do të bëhet në funksion të ekipit dhe rezultateve, pasi është vetë trajneri dhe stafi i tij që rrezikojnë shkarkimin në rast dështimi. Rasti i Musollit është disi më ndryshe, pasi pritet që ai ta nisë jo si titullar ndeshjen duke qenë se prej disa kohësh nuk ka luajtur rregullisht, për shkak të problemit shëndetësor që e mbajti jashtë. Të dy futbollistët janë të rëndësishëm për ekipin, e gjithçka pritet të jetë në favor të tyre. Në këtë ndeshje, grupi është i plotë dhe nuk ka mungesa.