Krasniqi “shkund” Apoloninë: Tirana s'është e pathyeshme
"Kush e besonte se Bylisi do t'i shkaktonte humbje?"
Apolonia do të luajë në kryeqytet këtë fundjavë me shpresën e vazhdimësisë së ecurisë pozitive në ndeshjet e transfertës. Të paktën, nga ajo që ka bërë këtë sezon deri tani jashtë Fierit, ndonëse përballë ka një skuadër me traditë siç është Tirana. Një tregues pozitiv për bardhejeshilët është fakti se kanë shënuar në të gjitha ndeshjet e deritanishme, çka dëshmon se skuadra i ka mëshuar fazës sulmuese dhe ka krijuar lojë e raste shënimi. E kur flitet për vijën e parë, pikë reference e padiskutueshme mbetet Blerim Krasniqi, futbollisti që po shndërrohet në goleador për fierakët. Ai nuk vuan më "hijen" e Uzunit (të cilit i pati dhuruar pasin e fundit sezonin e kaluar, duke sakrifikuar dhe veten si shënues) dhe nuk ka "frikë" të marrë përsipër përgjegjësinë e golit ndaj çdo kundërshtari, në çdo situatë e në çdo stadium. Një sezon ky i sivjetshmi, ku Krasniqi po dëshmon se është rritur ndjeshëm në planin futbollistik: ka shënuar 6 nga 11 gola të Apolonisë në total e jo më kot është në fokusin e shumë skuadrave të Superiores, që kanë janë në gjurmët e shtatlartit kavajas që luan te Apolonia.
DEKLARATA - Në një prononcim për "Panorama Sport", 21-vjeçari ka besim te një surprizë në kryeqytet dhe i bën thirrje skuadrës që të mos e shohin këtë përballje si një mision të pamundur. "Respekt Tiranës! - thotë sulmuesi. - Po përmende këtë emër, të kalon para syve gjithë historiku i futbollit shqiptar. Duket gati si një përrallë fakti që ata luajnë në Kategorinë e Parë. Por,
ky është realiteti e këtë javë janë kundërshtarët tanë. E kam ndjekur me interes atmosferën e kësaj ndeshjeje gjatë këtyre ditëve dhe më duket sikur ka njëfarë frike nga ana jonë, gati- gati po vetëdeklarohemi inferiorë e humbës pa e filluar lojën.
Shikoni, duhet ta flakim këtë ndjesi dëmtuese dhe le të marrim model frymëzimi Bylisin: para ndeshjes, a e mendoi kush se Tirana do humbiste me ta? Edhe Apolonia mund ta bëjë dhe për këtë duhet besim në vetvete. Besoj se do të shënojmë edhe në këtë ndeshje dhe pak rëndësi ka autori. Patjetër që e synoj golin personal sepse t'i shënosh Tiranës, është kënaqësi e veçantë, por mua më intereson më shumë rezultati i Apolonisë se sa një gol personal thjesht për statistikë e që nuk do i shërbente skuadrës", ka mbyllur Krasniqi.