Juventusi një ekip “pleqsh”, por e ka gati revolucionin
Alegri ka talentet në stol, si ndryshojnë bardhezinjtë
Xhanluixhi Bufon dhe Andrea Barza lji i dhanë zyrtarisht lamtumirën kombëtares italiane, ndoshta edhe Kielini. Por, pasojat e këtyre largimeve do të ndihen edhe në shtëpinë e Juventusit sepse të tre lojtarët janë shtylla kryesore e ekipit bardhezi. Është koha për të reflektuar dhe për të bërë ndryshimin e brezave në kampin e "Zonjës së Vjetër". Sepse vitet kalojnë dhe mbi shpatullat e kampionëve fillon të ndihet kjo gjë. Skuadra e Juventusit është ekipi me moshën mesatare më të lartë, 28.7 vjeç. Masimiliano Alegri ka për detyrë që jo vetëm të fitojë trofe me këtë skuadër, por mbi të gjitha të integrojë edhe lojtarët e rinj, të cilët duhet të kuptojnë shumë shpejt çfarë do të thotë të luash për Juventusin. Prej vitesh, Marota është duke punuar në këtë aspekt dhe po zgjedh lojtarët e rinj më interesantë në qarkullim për t'i afruar në kampin bardhezi.
REVOLUCION - Nuk është rastësi që Paolo Dilaba, vetëm 24 vjeç, është shndërruar lider i ekipit bardhezi dhe Daniele Rugani po kërkon të marrë përgjegjësinë e mbrojtjes së Juventusit. I pari është shpallur i paprekshëm nga drejtuesit e "Zonjës", ndërsa i dyti po pret që t'i sjellin në krah Matia Kaldarën (23 vjeç, luan tek Atalanta por e ka blerë Juventusi). Një tjetër lojtar që do të veshë fanellën bardhezi pritet të jetë Spinacola. Por, Masimiliano Alegri ka një tjetër yll në dispozicion që gjatë kësaj kohe ka vuajtur dëmtimet e shumta. Marko Pjaca do të ketë një rol të rëndësishëm në ciklin e ri fitues që Juventusi kërkon të nisë. Trajneri aktual e vlerëson shumë dhe, pak nga pak, do t'i japë minuta të rëndësishme për t'u rritur. Nuk përfundon këtu sepse këta janë ata që mund të quhet liderët e së ardhmes, por në organikën e Juventusit ka lojtarë të tjerë si De Shiljo, Bernardeski dhe Bentankur. Maks Alegri ka luksin që shpeshherë t'i mbajë në stol, por ai njihet si një "mjeshtër" i rritjes së talenteve
dhe Juventusi nën drejtimin e tij do të bëjë ndryshimin e brezave. Nga 31.8 vjeç në 24.4 vjeç, ky është kapërcimi që mund të ndodhë në kampin bardhezi. E para, është mosha mesatare e formacionit më të vjetër, ndërsa e dyta, mosha mesatare e skuadrës më të re.